Sosial

Ana səhifə

Sosial

Xüsusi qabiliyyət tələb edən ixtisaslar üzrə təhsil almaq istəyən abituriyentlər seçmə turlarda iştirak etməlidirlər

16 may 2011 08:20 (UTC +04:00)

Bakı. Sevil Valehova - APA. Ali təhsil və tam orta təhsil bazasında orta ixtisas təhsili müəssisələrinin xüsusi qabiliyyət tələb edən ixtisasları üzrə təhsil almaq istəyən abituriyentlər qəbul imtahanlarında iştirak etmək üçün ilk növbədə ümumi qaydada elektron ərizə formasını doldurmalı, onu təsdiq etdirməli, seçdikləri ixtisasa müvafiq qabiliyyət imtahanı komissiyasında mayın 31-dək TQDK tərəfindən mərkəzləşdirilmiş qaydada keçiriləcək seçmə turda iştirak etməli və müvəffəqiyyət qazandıqları təqdirdə qeydiyyatdan keçməlidirlər. Tələbə Qəbulu üzrə Dövlət Komissiyasının (TQDK) mətbuat xidmətindən APA-ya verilən məlumata görə, seçmə tur Təsviri sənət, Musiqi sənəti, Memarlıq və dizayn, Teatr, kino və xoreoqrafiya sənətləri, Bədən tərbiyəsi və idman istiqamətləri üzrə keçirilir.

Qabiliyyət imtahanı komissiyaları təhsil müəssisələri üzrə Bakı, Naxçıvan və Gəncə şəhərlərində, tam orta təhsil bazasında orta ixtisas təhsili müəssisələri üzrə Bakı, Naxçıvan, Gəncə, Lənkəran, Şəki şəhərlərində və Ağdam rayonu Quzanlı qəsəbəsində fəaliyyət göstərir. Bakı şəhərində 6 (ADRA, BMA, AMK nəzdində Musiqi Kolleci, AMİU-nun nəzdində Texniki Lisey, ADMİU-nun “Səda” Tədris Teatrı, ADBTİA), regionlar üzrə isə 6 (Naxçıvan Dövlət Universiteti, Gəncə Dövlət Universiteti, Azərbaycan Dövlət Aqrar Universiteti, Şəki Musiqi Kolleci, Lənkəran Dövlət Humanitar Kolleci, Ağdam Musiqi Kolleci) tədris müəssisəsində imtahan komissiyası təşkil olunub.

Bundan əlavə Teatr, kino və xoreoqrafiya sənətləri istiqaməti üzrə Gəncə şəhərində Gəncə Dövlət Dram Teatrında, Naxçıvan şəhərində Naxçıvan Dövlət Musiqili Dram Teatrında, Şəki şəhərində Şəki Dövlət Dram Teatrında və Lənkəran şəhərində Lənkəran Dövlət Dram Teatrında Seçmə tur keçiriləcək. Hər bir istiqamət üzrə seçmə turun cədvəli TQDK-nın internet səhifəsində yerləşdirilib.

Qabiliyyət imtahanlarının proqramları, qiymətləndirmə meyarları, tapşırıq nümunələri və metodiki tövsiyələr bu il “Abituriyent” jurnalının xüsusi buraxılışı olan “Təsviri sənət”, “Musiqi sənəti”, “Memarlıq və dizayn”, “Teatr, kino və xoreoqrafiya sənəti”, “Bədən tərbiyəsi və idman” adlı vəsaitlərdə çap olunmuşdur. Həmçinin “aktyor sənəti” və “rejissorluq” ixtisasları üzrə TQDK-nın saytında (www.tqdk.gov.az Qabiliyyət imtahanları linki) audiomaterial yerləşdirilib.

imtahan_təhsil