Sosial

Ana səhifə

Sosial

Komitə sədri: “Bu gün Azərbaycan hökuməti məcburi köçkünlərin bütün sosial ehtiyaclarını təmin etmək iqtidarındadır”

17 iyun 2011 12:33 (UTC +04:00)

Bakı. Sevil Zeynalqızı – APA. “Azərbaycanda məcburi köçkünlərin və yerli fermerlerin həyat şəraitinin yaxşılaşdırılması və FAO təcrübəsinin ölkənin digər rayonlarında yeni salınmış qəsəbələrdə təkrarlanma imkanları” mövzusunda konfrans keçirilib. APA-nın məlumatına görə, tədbirdə çıxış edən Qaçqın və Məcburi Köçkünlərin İşləri üzrə Dövlət Komitəsinin sədri Əli Həsənov bildirib ki, məcburi köçkünlərin həyata şəraitinin yaxşılaşdırılması üçün bir sıra layihələr həyata keçirilir. Onlardan biri də “Ağdam rayonu ərazisində yeni salınmış qəsəbələrdə məskunlaşmış məcburi köçkün və qaçqınlar üçün bacarıqların artırılması naminə inkişaf layihəsi”dir.

Ə. Həsənov deyib ki, layihə İsveç hökumətinin vəsaiti ilə İsveçrə Əməkdaşlıq Təşkilatı, BMT-nin Kənd Təsərrüfatı və Ərzaq Təchizatı Təşkilatı (FAO) tərəfindən icra edilir: “Bu layihə Ağdam rayonu ərazisində məskunlaşmış məcburi köçkünlərin bilik və bacarıqlarının artırılması, eləcə də kənd təsərrüfatı məhsullarının istehsalına yönəldilmiş bir layihədir. Layihənin birinci fazası təxminən 664 min dollar, ikinci fazası 1 milyon 700 min dollar həcmindədir. Burada hökumətin payı isə 15 faizdir”.

Bu gün Azərbaycan hökumətinin məcburi köçkünlərin bütün sosial ehtiyaclarını təmin etmək iqtidarında olduğunu vurğulayan komitə sədri bəyan edib ki, Azərbaycan beynəlxalq təşkilatlarla da əməkdaşlığı davam etdirmək niyyətindədir.

Kənd təsərrüfatı nazirini müavini Bəhram Əliyev bildirib ki, 2007-ci ildən həyata keçirilən layihə Ağdam rayonunun 14 qəsəbə və 7 yerli kəndində reallaşıb, 3100-dən çox ailəyə tərəvəz məhsullarının becərilməsində yardım göstərilib. O qeyd edib ki, kənd təsərrüfatı sektoru üzrə yerli xidmət təchizatçılarının dəstəyi ilə layihə çərçivəsində 45 aparıcı fermer seçilib və 68 fermer əsaslı təşkilat yaradılıb: “Kənd Təsərrüfatı Nazirliyi Ağdamda tətbiq olunan təcrübənin digər regionlarda da tətbiqinin mümkünlüyünün təhlil edilməsini FAO-ya təklif edib. Azərbaycanın digər rayonlarında köçkün və yerli fermerlərin gəlir ehtiyaclarını aradan qaldırmaq üçün Ağdam rayonunda həyata keçirilən layihə yanaşmasının yerli şəraitə uyğunlaşdırılması vacibdir”.