Sosial

Ana səhifə

Sosial

Misir Mərdanov Gürcüstanda Azərbaycan, Azərbaycanda isə gürcü tarixi və coğrafiyasının öyrənilməsi ilə bağlı birgə vəsaitin hazırlanması təklifi irəli sürüb

17 iyun 2011 14:05 (UTC +04:00)

APA-nın Təhsil Nazirliyinin saytına istinadən verdiyi məlumata görə, Azərbaycan və gürcü xalqlarının dostluğundan, iki ölkə arasında əlaqələrdən söz açan M. Mərdanov təhsil sahəsində mövcud əməkdaşlığın inkişaf istiqamətlərindən bəhs edib.

O, Gürcüstanda fəaliyyət göstərən Azərbaycan məktəbləri üçün Azərbaycan dilində dərsliklərin hazırlanması məsələsinə toxunub, azərbaycanlı mütəxəssislərin bu işdə yaxından iştirak etməsi təklifini irəli sürüb. Eyni zamanda M. Mərdanov Gürcüstandakı Azərbaycan məktəblərində aparılan əsaslı təmir və tikinti işlərinə lazımi köməklik göstərməyə hazır olduğunu qeyd edib.

Nazir qonaqların bir neçə təhsil müəssisəsinə baş çəkməsini tövsiyə edib, onların ölkəmizin təhsil sistemi ilə yaxından tanış olmasının əhəmiyyətini vurğulayıb.

Öz növbəsində, D. Şaşkin iki ölkə arasındakı dostluq əlaqələrindən və səmərəli əməkdaşlıqdan söz açaraq Gürcüstandakı Azərbaycan məktəblərinin maddi-texniki bazasının inkişaf etdirilməsi məqsədilə görülən işlərdən danışıb. Qonaq Gürcüstanda bu il I-VI, gələn tədris ilində isə VII-XI siniflər üçün Azərbaycan dilində dərsliklərin hazırlanmasının nəzərə tutulduğunu qeyd edib. O, ölkəsindəki Azərbaycan məktəblərini bitirmiş məzunların Gürcüstanın ali məktəblərində təhsil alması üçün yaradılmış şəraitdən, müəyyən kvota və imtiyazlardan söz açıb. D. Şaşkin, həmçinin Gürcüstanın təhsil sistemi, orta təhsilin inkişafı üzrə aparılan islahatlar haqqında məlumat verib və qarşıda duran məsələlərin həlli istiqamətində görülən işlərdən danışıb.

Görüşdə Gürcüstandakı Azərbaycan məktəblərinin informasiya-kommunikasiya texnologiyaları ilə təminatı, gələcəkdə birgə fənn olimpiadalarının təşkil olunması, ölkəmizdə gürcü dilinin, Gürcüstanda isə Azərbaycan dilinin tədrisi və digər məsələlərlə bağlı fikir mübadiləsi aparılıb.

M. Mərdanov Gürcüstanda Azərbaycan, Azərbaycanda isə gürcü tarixi və coğrafiyasının öyrənilməsi ilə bağlı birgə vəsaitin hazırlanması, orta məktəblərdə fakültativ kursların təşkil olunması ilə bağlı təklif irəli sürüb.

Qonaq isə öz növbəsində bu məsələyə dair lazımi addımlar atmağa hazır olduğunu və bununla bağlı komissiya yaradılacağını bildirib.