Sosial

Ana səhifə

Sosial

Ombudsman MST-lərə və Qazax Rayonlararası Ruhi Xəstəxanasına baxış keçirib

10 noyabr 2011 16:51 (UTC +04:00)

Bakı - APA. Azərbaycanın İnsan Hüquqları üzrə Müvəkkili (Ombudsman) Elmira Süleymanova Milli Preventiv Mexanizm (MPM) qrupunun üzvləri olan Ombudsman Aparatının əməkdaşları ilə birgə Şəmkir, Tovuz, Ağstafa və Qazax rayon polis şöbələrinin (RPŞ) MST-lərinə baxış keçirib.

Ombudsman Aparatının mətbuat xidmətindən APA-ya verilən məlumata görə, baxış zamanı saxlanılan şəxslərlə təkbətək söhbət aparılıb, onlara hüquqları izah olunub, saxlanılmanın qanuniliyini təsdiq edən sənədlər yoxlanılıb.

Habelə saxlanma şəraitinin müvafiq normalara uyğunluğu, həmin şəxslərin vəkillə təmin olunması, hər hansı kobud rəftara məruz qalıb-qalmaması, tibbi yardımın göstərilməsi, saxlanma şəraiti ilə əlaqədar kameraların normal işıqlanma və ventilyasiyası, ibadət otağının olması, gündəlik isti yeməyin verilməsi, gigiyena tələblərinə riayət edilməsi vəziyyəti yoxlanılıb. Söhbət aparılmış şəxslər saxlanma şəraitindən, müəssisə rəhbərliyi və əməkdaşları tərəfindən onlara qarşı rəftardan narazılıq bildirməyiblər.

Baxış zamanı həmin MST-lərin şəraitinin standartlara uyğun olduğu müəyyən edilib. Ombudsman baxış keçirilmiş müəssisələrin rəhbərliyinə saxlanma şəraitinin daha da təkmilləşdirilməsi ilə bağlı müvafiq tövsiyələr verib.

Bundan başqa, Ombudsman MPM qrupunun üzvləri ilə birgə Qazax Rayonlararası Ruhi Xəstəxanasına başçəkmə həyata keçirib. Ombudsman bu müəssisədəki inzibati otaqlara, müalicə və müayinə otaqlarına, palatalara, xəstələrin qaldığı otaqlara baxmış, burada saxlanılan və müalicə olunanların vəziyyəti ilə tanış olub. O, xəstələrlə görüşüb, saxlanma şəraitini, müayinə və müalicə prosesini öyrənib. Söhbət zamanı xəstələrlə rəftar, onların qidalanması, ərzaq məhsulları və dərman preparatları ilə təmini vəziyyəti də araşdırılıb. Müxtəlif məzmunlu məsələlərlə bağlı müraciət etmək istəyən xəstələr dinlənilib, onların problemləri öyrənilib.

Ombudsman bu müəssisələrdə xəstələrə gündəlik qidalanma və dava-dərman üçün ayrılan vəsaitlə maraqlanıb. Qazax Rayonlararası Ruhi Xəstəxanasının baş həkimi müəssisədə 100 nəfərlik çarpayı olduğunu, hazırda burada 70 xəstənin müalicə edildiyini qeyd edərək xəstəxananın fəaliyyəti barədə məlumat verib.

Monitorinq zamanı xəstəxana binasının əsaslı təmirə ehtiyacı olduğu, dərman çatışmazlığının olmadığı, eyni zamanda yataq dəstlərinin köhnəliyi müəyyən edilib. Ombudsman müəssisədəki problemləri diqqətdə saxlayacağını və bunların həlli ilə bağlı müvafiq dövlət orqanlarına müraciət edəcəyini bildirib.