Sosial

Ana səhifə

Sosial

“Milli təhlükəsizliklə bağlı ixtira, faydalı model və sənaye nümunəsinə dair iddia sənədinə baxılma Qaydaları” təsdiqlənib

11 noyabr 2011 11:55 (UTC +04:00)

Bakı. Rəşad Süleymanov – APA. Azərbaycan Nazirlər Kabineti "Milli təhlükəsizliklə bağlı ixtira, faydalı model və sənaye nümunəsinə dair iddia sənədinə baxılma Qaydaları"nı təsdiq edib. Bu barədə APA-ya Nazirlər Kabinetindən məlumat verilib.

Qaydalara əsasən milli təhlükəsizliklə bağlı ixtira, faydalı model və sənaye nümunəsi (məxfi ixtira) dövlət sirri təşkil edən məlumat daşıyıcısı hesab edilir. Məxfi olduğu ehtimal edilən ixtira, faydalı model və sənaye nümunəsinə dair iddia sənədi fiziki və ya hüquqi şəxslər tərəfindən “Patent haqqında” qanunun 27-ci maddəsinə uyğun tərtib edilərək Standartlaşdırma, Metrologiya və Patent üzrə Dövlət Komitəsinin dövlət sirrinin mühafizəsi üzrə bölməsinə (DSMB) təqdim olunmalıdır. Bu zaman məxfi olduğu ehtimal edilən ixtira, faydalı model və sənaye nümunəsinə aid bütün digər məlumat daşıyıcıları - vərəqlər, audio, video, foto və kinolentlər, disklər, disketlər və digər materiallar da təqdim edilməlidir.

Məxfi ixtira, faydalı model və sənaye nümunəsinə dair iddia sənədi ekspertizadan keçdikdən sonra qeydiyyatı və patentin verilməsi barədə qərar qəbul edilir. Patent verilməsi barədə qərar əsasında 1 ay müddətində ixtira, faydalı model və sənaye nümunəsi xüsusi dövlət reyestrində qeydiyyata alınır və patent tərtib olunaraq patent sahibinə və ya onun hüquqi varisinə verilir.

Qaydalarda əsasən iddiaçıya və ya onun hüquqi varisinə dəyən ziyanın əvəzinin ödənilməsi, dövlət rüsumu və digər məsələlər əksini tapıb. Qaydalarda ixtira, faydalı model və sənaye nümunəsinin məxfiləşdirilməsi ilə əlaqədar iddiaçıya dəyən ziyanın əvəzinin ödənilməsi üçün bağlanan müqavilədə iddiaçının məxfi məlumatları yaymaması barədə öhdəliyi də nəzərdə tutulur. İddiaçı müqaviləni imzalamaqdan imtina edərsə, ona məxfi məlumatları icazəsiz yaymağa görə qanunvericilikdə nəzərdə tutulmuş məsuliyyət barədə xəbərdarlıq edilməlidir.