Sosial

Ana səhifə

Sosial

Ombudsman Milli Fəaliyyət Proqramının vətəndaş cəmiyyəti ilə birgə müzakirəsinə həsr olunmuş dəyirmi masa keçirib

31 yanvar 2012 16:44 (UTC +04:00)

Bakı-APA. Azərbaycanın İnsan Hüquqları üzrə Müvəkkili Elmira Süleymanova “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”nın vətəndaş cəmiyyəti ilə birgə müzakirəsinə həsr olunmuş dəyirmi masa keçirib. Tədbirdə vətəndaş cəmiyyətinin, 30-dan artıq QHT-nin təmsilçiləri, habelə KİV nümayəndələri iştirak ediblər.

Ombudsman son dövrdə ölkəmiz üçün olduqca önəmli hadisələrin baş verdiyini, Azərbaycanın BMT-nin Təhlükəsizlik Şurasına qeyri-daimi üzv seçilməsinin respublikamızın beynəlxalq imicinin daha da yüksəlməsinin, dünya birliyindəki yerinin daha da möhkəmlənməsinin təsdiqi olduğunu diqqətə çatdırıb. O, bəşər tarixində insanlığa qarşı ən qatı cinayətlərdən olan Xocalı soyqırımının 20-ci ildönümünün yaxınlaşdığını vurğulayıb, Fransa Senatının uydurma “erməni soyqırımı”nın inkarına görə cinayət məsuliyyəti nəzərdə tutan qanunun qəbulu ilə bağlı atdığı addımın insan hüquqlarına tamamilə zidd bir hərəkət, beynəlxalq hüquq normalarının kobud şəkildə pozulmasının daha bir nümunəsi olduğunu və haqlı olaraq dünya ictimaiyyəti tərəfindən kəskin etirazla qarşılandığını söyləyib.

Müvəkkil insan hüquqları sahəsində ilk proqramın Ümummilli lider Heydər Əliyevin respublikamıza rəhbərliyi dövründə qəbul edildiyini, onun 1998-ci il 18 iyun tarixli Sərəncamı ilə təsdiq olunmuş “İnsan hüquqlarının müdafiəsinə dair Dövlət Proqramı”nın ölkəmizdə insan və vətəndaş hüquq və azadlıqlarının müdafiəsi işində mühüm əhəmiyyət kəsb etdiyini və önəmli rol oynadığını bildirib.

Ombudsman qeyd edib ki, Milli Fəaliyyət Planının icrası prosesində müxtəlif illərdə ölkəmizin 58 rayonunda mütəmadi olaraq yerli icra hakimiyyəti, məhkəmə, prokurorluq, polis və digər dövlət orqanlarının, bələdiyyələrin, seçki komissiyalarının, icmaların, o cümlədən qaçqın və məcburi köçkünlərin, milli azlıqların, həmçinin çoxsaylı yerli QHT və KİV nümayəndələrinin iştirakı ilə ictimai dinləmələr keçirilmiş, təhlillər aparılmış, yekun konfranslar təşkil olunub, nəticədə irəli sürülmüş təkliflər müvafiq dövlət orqanlarına göndərilib.

Milli Fəaliyyət Proqramında bütün vəzifələr, məsul icraçılar və icra müddətlərinin göstərildiyini vurğulayan Müvəkkil yerlərdə müvafiq dövlət qurumlarının və vətəndaş cəmiyyəti institutlarının bilavasitə iştirakı ilə adı çəkilən Proqramın tam şəkildə həyata keçirilməsi üçün şərait yaradılmasının, icraçıların məsuliyyət hissinin artırılmasının zəruriliyini qeyd edib.

Tədbirdə çıxış edən Ombudsman Aparatının rəhbəri Aydın Səfixanlı, Azərbaycan Milli QHT Forumunun prezidenti Rauf Zeyni, Uşaq Hüquqları üzrə QHT Alyansının idarə heyətinin sədri Nazir Quliyev, Cəmiyyətin və Vətəndaş Münasibətlərinin İnkişafı Mərkəzinin rəhbəri Əhməd Abbasbəyli, İnsan hüquqları üzrə Maarifləndirmə İctimai Birliyinin sədri İradə Cavadova, Səhiyyə və Sağlam Həyat İctimai Birliyinin rəhbəri Lətafət Əlizadə, Daun Sindromlu Uşaqlar İctimai Birliyinin sədri Gülarə Teymurova və başqaları müzakirə olunan məsələ ilə bağlı fikir və mülahizələrini söyləyib, proqramın həyata keçirilməsində vətəndaş cəmiyyətinin potensialından effektiv istifadə olunmasının vacibliyini vurğulayıblar.