Sosial

Ana səhifə

Sosial

Səbail rayon İcra Hakimiyyətində 2011-ci ilin yekunlarına dair konfrans keçirilib - FOTO

Səbail rayon İcra Hakimiyyətində 2011-ci ilin yekunlarına dair konfrans keçirilib - <font color=red>FOTO</font>

01 fevral 2012 10:59 (UTC +04:00)

Bakı. Ramil Məmmədli – APA. Bakı şəhərinin Səbail rayon İcra Hakimiyyətində 2011-ci ilin yekunlarına dair konfrans keçirilib. APA-nın məlumatına görə, ölkənin və Səbail rayonunun sosial-iqtisadi həyatından bəhs edən video-çarx nümayiş olunduqdan sonra İcra Hakimiyyətinin başçısı Asif Əsgərov hesabat xarakterli çıxış edib.

A. Əsgərov bildirib ki, rayonun yol təsərrüfatı, nəqliyyat, ekologiya, səhiyyə, rabitə və informasiya sahəsi, qaz, elektrik enerjisi, istilik, su və kanalizasiya təchizatının yüksək səviyyəyə qaldırılması üçün bir sıra infrastruktur layihələri həyata keçirilib: “Ötən il Səbail rayonunda nəzərəçarpacaq müsbət dəyişikliklər baş verib. 2011-ci ilin yekunlarına görə rayonun sənaye müəssisələri üzrə 24 milyard 338,6 milyon manatlıq və ya əvvəlki ilin müvafiq dövrü ilə müqayisədə 19,9 faiz çox məhsul istehsal edilib və xidmətlər göstərilib. Sənaye məhsulunun ümumi həcmində qeyri-dövlət sektorunun xüsusi çəkisi 92,6 faiz olub. Sənaye məhsulunun natura ifadəsində həcmi ötən ilin müvafiq dövrü ilə müqayisədə 9,9 faiz artıb”.

A. Əsgərov qeyd edib ki, 2011-ci ildə Səbail rayon İcra Hakimiyyətinin daxili imkanları hesabına rayonda bir sıra genişmiqyaslı təmir-abadlıq işləri aparılıb ki, bu işlərin də əksəriyyəti sosial yönümlü olub, vətəndaşların rifahının yüksəldilməsinə yönəlib.

Tədbirdə Bayıl yaşayış sahəsindəki “Əbədi məşəl” kompleksinin yaxınlığında “Gülüstan” sarayına doğru uzanan ərazidə torpaq sürüşməsi hadisəsinə də toxunulub və bildirilib ki, hazırda müvafiq qurumlar tərəfindən bu ərazidə qoyulan mayaklar gündəlik yoxlanılır, heç bir aktivləşmə və sakinlərin həyatı üçün hər hansı təhlükə baş verməyib.

Tədbirdə Səbail Rayon Polis İdarəsinin rəisi İlqar Mahmudov, Prezident Administrasiyası ərazi idarəetmə şöbəsinin məsul işçisi Tağı Tağıyev və digərləri də çıxış edib.

Yığıncağın sonunda bu il yubileyləri keçiriləcək bir qrup ziyalıya və 2011-ci ildə müxtəlif müsabiqə və yarışlarda iştirak edib yüksək nəticələr göstərən 10 orta məktəb şagirdinə hədiyyələr təqdim olunub.