Sosial

Ana səhifə

Sosial

ARDNŞ-ın Elm Fondunun 2012-ci il üçün elmi-tədqiqat layihələri üzrə müsabiqəsinin nəticələri açıqlanıb

20 sentyabr 2012 08:51 (UTC +04:00)

Bakı. Kəmalə Quliyeva-APA. Azərbaycan Respublikası Dövlət Neft Şirkətinin (ARDNŞ) Elm Fondunun 2012-ci il üçün elmi-tədqiqat layihələri üzrə elan etdiyi müsabiəqnin nəticələri açıqlanıb. Azərbaycan Milli Elmlər Akademiyasının (AMEA) mətbuat xidmətindən APA-ya verilən xəbərə görə, təbiət və texnika elmləri sahəsində fundamental və tətbiqi xarakterli elmi-tədqiqat layihələrini, neft, qaz və neft-kimya sənayesi ilə əlaqədar elmi araşdırmaları daha da inkişaf etdirmək, alimlərin elmi fəaliyyətini stimullaşdırmaq və onlara əlavə yaradıcılıq imkanları yaratmaq məqsədilə elan edilən müsabiqəyə 58 layihə təqdim edilib. Təqdim olunan layihələrin ekspertizası məqsədilə Müsabiqə Komissiyası yaradılıb və Komissiyanın tərkibinə müsabiqədə elan olunmuş elm sahələri üzrə AMEA və ARDNŞ-in aparıcı alimləri və mütəxəssisləri daxil edilib.

Fondun Əsasnaməsinə uyğun olaraq qeydiyyatdan keçmiş layihələrin ciddi ekspertizası təşkil edilib, müsabiqənin təşkili və layihələrin ekspertizası ilə bağlı Müsabiqə Komissiyasının və İdarə Heyətinin bir neçə iclası keçirilib. Müsabiqə Komissiyasının və ekspertlərin rəylərini nəzərə alaraq ARDNŞ-in Elm Fondunun İdarə Heyəti 24 layihəni qalib elan edib.