Sosial

Ana səhifə

Sosial

Azərbaycan Osloda keçirilən Beynəlxalq Sosial Təminat Assosiasiyasının Avropa Regional Toplantısında iştirak edib

21 may 2007 13:06 (UTC +04:00)

Azərbaycan Dövlət Sosial Müdafiə Fondunun sədr müavini Zakir Babayevin başçılıq etdiyi nümayəndə heyəti Norveçin paytaxtı Oslo şəhərində “Əmək həyatına cəlbetmə” mövzusunda keçirilən Beynəlxalq Sosial Təminat Assosiasiyasının (BSTA) Avropa Regional Toplantısında iştirak edib. Bu toplantı BSTA və Norveçin Əmək və Maddi Rifah İdarəsi tərəfindən təşkil olunub.
Dövlət Sosial Müdafiə Fondunun mətbuat xidmətindən “APA-Economics”ə verilən məlumata görə, toplantıda qeyd olunub ki, hazırda əmək həyatına cəlbetmə problemi Avropa ölkələrində böyük problemlərdən biridir. Çox ölkələrin üzləşdiyi bu məsələnin mahiyyəti gəlirləri (və ya onun böyük hissəsini) sosial müavinətlərdən (o cümlədən pensiyadan) ibarət olan əhali hissəsinin xüsusi çəkisini azaltmaqdır. Bununla bağlı çox sayda təkliflər var ki, onlar da insanların əmək məşğulluğuna qayıtmasını stimullaşdırır. Baş verən demoqrafik dəyişikliklər və sosial müdafiə sisteminin sabitliyinin təmin edilməsi zərurəti ölkələri məcbur edir ki, bu növ siyasi və iqtisadi tədbirlərə əl atsınlar və bu tədbirlər əhalinin xüsusi kateqoriyasına yönəlmiş olsun.
Uzunmüddətli işsizlik probleminin həllinin vacibliyini inkar etmədən Avropanın inkişaf etmiş ölkələrində həyata keçirilən bu proqramlar məşğulluq bazarından çıxarılmış, çıxarılma prosesində olan və çıxarılma təhlükəsi gözləyən əhali qruplarına birinci dərəcəli əhəmiyyət verməyi nəzərdə tutur.
BSTA-nın Avropa Toplantısında bu məsələnin müzakirəsi zamanı tez pensiyaya çıxmaq prosesinin qarşısını almaqla məşğul və qeyri-məşğul əhalinin nisbətini necə dəyişmək və əhalinin əmək məşğulluğu dövrünü necə artırmaq sualları müzakirə obyekti olub.
Tədbirdə aktiv sosial siyasət, daha çox yaşayıb daha çox işləmək, pensiyaya çıxma yaşının qaldırılması, əmək qabiliyyətinin müvəqqəti itirilməsi problemləri, Norveçin pensiya sistemi, əlillik pensiyaları, əmək bazarı və əməyin stimullaşdırılması məsələləri də müzakirə edilib. /APA-Economics/