Sosial

Ana səhifə

Sosial

Sumqayıtda Qarabağ müharibəsi veteranları üçün ayrılmış ərazi zəbt edilib

04 iyun 2007 10:47 (UTC +04:00)

Azərbaycan Vətən Müharibəsi Veteranlar Birliyinin (AVMVB) Sumqayıt şöbəsi şəhər İcra Hakimiyyətinin sərəncamı ilə “Daşbazarı” adlanan ərazisində onlar üçün ayrılan 50 kvadrat metrlik torpaq sahəsinin orada daşınmaz əmlak alveri ilə məşğul olan Əsgər Feyziyev tərəfindən qeyri-qanuni zəbt edilməsi ilə bağlı zərərçəkmişlər tərəfindən mətbuat konfransı keçirilib. APA-nın məlumatına görə, şöbənin sədr əvəzi Aydın Məmmədli bildirib ki, həmin obyekt Sumqayıt ŞİH-in 1998-ci il sərəncamı və inşaat pasportu ilə ticarət məqsədilə birliyə verilib. 2001-ci ildə isə həmin ərazidə daşınmaz əmlak alveri ilə məşğul olan Ə. Feyziyev adlı şəxs tərəfindən obyektin ərazisini qeyri-qanuni zəbt etməyə cəhd edib. Dəfələrlə ŞİH-ə müraciət edilsə də, nəticəsiz qalıb. AVMVB-nin üzvü Elşad Baxşəliyev isə məsələ ilə əlaqədar məhkəməyə müraciət etdiklərini deyib: “Şəhər və apelyasiya məhkəməsi veteranların xeyrinə qərar versə də, Ali Məhkəmənin hakimi Vafəddin İbayevin sədrliyi ilə keçirilən iclasda heç bir əsas gətirilmədən xeyrimizə çıxarılan 2 məhkəmə qətnaməsi ləğv edilib”. O, məhkəmənin qərarından Ali Məhkəmənin plenumuna kasasiya şikayəti verildiyini də söyləyib: “Əgər məsələyə ədalətli baxılmasa, iyunun 8-də Ali Məhkəmənin binası qarşısında piket keçirəcəyik”. Ali Məhkəmənin hakimi Vafəddin İbayev isə tərəflərin qərarla bağlı tənqidi fikir söyləməsini hüquqi cəhətdən yanlış adlandırıb: “Ali Məhkəmə aşağı məhkəmə instansiyalarının qətnaməsi haqda qərar çıxarır. Bu məsələdə də müəyyən prosessual məqamlar nəzərə alınmadığından, işə yenidən baxılması üçün Apelyasiya Məhkəməsinə qaytarılması haqda qərar qəbul olunub”. /APA/