Sosial

Ana səhifə

Sosial

Şəkidə “Sənətkarlar günü” keçiriləcək

19 iyun 2007 08:41 (UTC +04:00)

İyunun 23-də Şəkidə “Sənətkarlar günü” adlı bayram keçiriləcək. Bu barədə APA-nın Şəki-Zaqatala bürosuna Şəki Rayon İcra Hakimiyyəti (RİH) başçısının mədəniyyət və təhsil məsələləri üzrə müavini Zərinə Cavadova məlumat verib. Onun sözlərinə görə, tədbirin təşkilatçısı Mədəniyyət və Turizm Nazirliyi ilə Şəki RİH-dir. Tədbirin keçirilməsində məqsəd tarixən mövcud olan sənət sahələrini qoruyub saxlamaq, gənc nəsildə bu sahəyə maraq oyatmaq və turizmi inkişaf etdirməkdir. Bayram tədbirində Azərbaycanda fəaliyyət göstərən bir sıra ölkələrin, o cümlədən Rusiya, Özbəkistan, Hindistan, Cənubi Koreya, Polşa, Bolqarıstan, Misir, Səudiyyə Ərəbistanı, Çin, Litva və Türkiyə səfirliklərindən nümayəndələr iştirak edəcək. Bayram tədbiri zamanı qonaqlar “Sənətkarlar evi”nin açılış mərasimində iştirak edəcək, bayram günü təşkil olunacaq satış yarmarkasında sənət nümunələri ilə tanış olacaqlar. Z. Cavadovanın sözlərinə görə, iyunun 23-də keçiriləcək “Sənətkarlar günü” konsert proqramı və atəşfəşanlıqla sona yetəcək. /APA/