Sosial

Ana səhifə

Sosial

İyunun 1-nə Azərbaycanda iqtisadi fəal əhalinin sayı 4 278,4 min nəfərə, rəsmi işsiz statusuna malik olanların sayı isə 52,408 min nəfərə çatıb

20 iyun 2007 11:22 (UTC +04:00)

Cari ilin iyun ayının 1-nə Azərbaycanda iqtisadi fəal əhalinin sayı 4 278,4 min nəfərə çatıb və onların 3 988,3 min nəfərini məşğul əhali təşkil edib. Yanvar-aprel aylarında iri və orta müəssisə və təşkilatlarda muzdla çalışan 1 282,8 min nəfərin 843,3 mini iqtisadiyyatın dövlət bölməsində, 439,5 mini isə qeyri-dövlət bölməsində fəaliyyət göstərib.
Dövlət Statistika Komitəsindən “APA-Economics”ə verilən məlumata görə, muzdla işləyənlərin 20,4%-i istehsal sahəsində, o cümlədən, 13,2%-i sənayedə, 4,4%-i tikintidə, 2,8%-i kənd təsərrüfatı, ovçuluq, meşə təsərrüfatı və balıqçılıq sahəsində məşğul olub. Xidmət sahəsində çalışanların 25,6%-i təhsil, 20,2%-i topdan və pərakəndə ticarət, avtomobillərin, məişət məmulatlarının və şəxsi istifadə əşyalarının təmiri, 10,3%-i səhiyyə və sosial xidmətlərin göstərilməsi, 6,9%-i nəqliyyat, anbar təsərrüfatı və rabitə, 5,8%-i digər kommunal, sosial və şəxsi xidmətlərin göstərilməsi, 4,7%-i daşınmaz əmlakla əlaqədar əməliyyatlar, icarə və istehlakçılara xidmət göstərilməsi, 3,9%-i dövlət idarəetməsi və müdafiə sahəsində, 2,2%-i isə digər sahələrdə işləyib.
Qeyd edək ki, bu ilin yanvar-aprel aylarında müəssisə və təşkilatlarda 4,8 min nəfər əcnəbi iqtisadi əmək fəaliyyəti ilə məşğul olub. Əcnəbilərin 1,4 min nəfəri sənayedə, 1,3 min nəfər tikintidə, 1 min nəfəri daşınmaz əmlakla əlaqədar əməliyyatlar, icarə və istehlakçılara xidmət göstərilməsi sahəsində, 0,5 min nəfəri topdan və pərakəndə ticarət, avtomobillərin, məişət məmulatlarının və şəxsi istifadə əşyalarının təmiri sahəsində, 0,3 min nəfəri təhsildə, 0,1 min nəfəri nəqliyyat, anbar təsərrüfatı və rabitə sahəsində və 0,2 min nəfəri digər sahələrdə işləyib.
Cari ilin ilk 4 ayı ərzində müəssisə və təşkilatlarda tutulan iş yerlərinin ümumi sayında kənar əvəzçilərin payı 0,6% və mülki-hüquqi xarakterli müqavilələr əsasında işləri yerinə yetirən şəxslərin payı 1,3% təşkil edib. Əvəzçilərin və mülki-hüquqi xarakterli müqavilələr əsasında işləyənlərin əksəriyyəti tikintidə, təhsildə, nəqliyyat, anbar təsərrüfatı və rabitədə, daşınmaz əmlakla əlaqədar əməliyyatlar, icarə və istehlakçılara xidmət göstərilməsi sahəsində qeydə alınıb.
Məşğulluq mərkəzlərinin məlumatına görə, 2007-ci il iyun ayının 1-nə rəsmi işsiz statusuna malik olan şəxslərin sayı 52 min 408 nəfər olub, onların 51%-ni qadınlar təşkil edib. Bir boş iş yerinə tələbat işsiz statusuna malik olan 4 nəfər şəxsdən ibarət olub. İşsizliyə görə müavinətin orta məbləği 59,2 manat olub. /APA-Economics/