Sosial

Ana səhifə

Sosial

Naxçıvanda “Azərbaycan kənd investisiya layihəsi” çərçivəsində daha 4 icma layihəsinin icrasına başlanacaq

21 iyun 2007 10:31 (UTC +04:00)

Naxçıvanda “Azərbaycan kənd investisiya layihəsi” çərçivəsində daha 4 müxtəlif icma layihəsinin icrasına başlanacaq. APA-nın Naxçıvan bürosunun məlumatına görə, layihələrin icrası ilə əlaqədar artıq tender elan edilib. Naxçıvan Regional Əməliyyatlar Ofisinin rəhbəri Əbülfət Əhmədov Muxtar Respublikanın ayrı-ayrı rayonlarını əhatə etməklə daha 4 kənd üzrə İcma Layihə Komitələrinin (İLK) hazırladığı layihələrin artıq bəyənildiyini, bununla bağlı tenderdə iştirakda marağı olan hüquqi və fiziki şəxslərin sənədlərinin qəbuluna başlandığını bildirib. Tenderdə iştirakın müəyyənləşdirilməsi iyulun 5-dək davam edəcək. Həyata keçiriləcək yeni layihələrə uyğun olaraq Babək rayonunun Qoşadizə və Kəngərli rayonunun Qabıllı kəndində “İçməli su təminatı”, Şərur rayonunun Zeyvə kəndində “Tibb məntəqəsinin tikintisi”, Çomaxtur kəndində isə “Suvarma su təminatı” layihələri icra olunacaq. İcra prosesinə iyulun ilk ongünlüyündən başlanacaq. Qeyd edək ki, “Azərbaycan kənd investisiya layihəsi”ni Dünya Bankı Azərbaycan hökuməti ilə birgə həyata keçirir. Layihənin müddəti 2008-ci ilin sonuna qədərdir. Layihənin müddətinin uzadılması istisna edilmir. /APA/