Sosial

Ana səhifə

Sosial

Azərbaycanda işçilərin orta aylıq əmək haqqı yanvar-may aylarında 26% artıb

21 iyun 2007 14:28 (UTC +04:00)

Cari ilin yanvar-may aylarında Azərbaycan iqtisadiyyatında çalışan işçilərin orta aylıq əmək haqqı 168,6 manat təşkil edib. Bu, əvvəlki ilin müvafiq dövrünə nisbətən 26,1% çoxdur.
Dövlət Statistika Komitəsindən “APA-Economics”ə verilən məlumata görə, daha yüksək orta aylıq əmək haqqı mədənçıxarma sənayesində, maliyyə fəaliyyətində, daşınmaz əmlakla əlaqədar əməliyyatlar, icarə və istehlakçılara xidmət göstərilməsi sahəsində, tikinti təşkilatlarında müşahidə olunub.
Qeyd edək ki, bu ilin yanvar-aprel aylarında müəssisə və təşkilatlarda işçilərə ödənilən 3,4 mln. manatlıq sosial xüsusiyyətli ödəmələrin əsas hissəsini emal sənayesində, elektrik enerjisi, qaz və suyun istehsalı və bölüşdürülməsi sahəsində, nəqliyyat, anbar təsərrüfatı və rabitə sahələrində çalışan işçilər alıb.
Müəssisə və təşkilatlarda çalışan kənar əvəzçilərin orta aylıq əmək haqqı isə 86,4 manat və mülki-hüquqi xarakterli müqavilələr üzrə işləyənlərin orta aylıq əmək haqqı 158,3 manata bərabər olub. /APA-Economics/