Sosial

Ana səhifə

Sosial

Azərbaycanda Ombudsmanların VI Beynəlxalq Konfransı keçirilir

18 iyun 2008 11:17 (UTC +04:00)

APA-nın xəbərinə görə, BMT-nin İnsan Hüquqları Bəyannaməsinin qəbul olunmasının 60 illiyinə və “18 iyun Azərbaycanda insan hüquqları günü”nə həsr olunan “Qloballaşan dünyada insan hüquqları” mövzusunda keçirilən konfransda çıxış edən Azərbaycanın İnsan Hüquqları üzrə Müvəkkili Elmira Süleymanova deyib ki, toplantıda 50 ölkənin ombudsman təsisatının nümayəndələri, ombudsmanlar iştirak edir. Ombudsman mayın 19-dan iyunun 18-ə qədər Azərbaycanda insan hüquqları aylığının keçirildiyini, aylıq çərçivəsində bir çox tədbirin təşkil olunduğunu deyib. E. Süleymanova qeyd edib ki, aylıq çərçivəsində bütün cəzaçəkmə müəssisələrinə də baxış keçirilib.
Prezident Aparatının hüquq-mühafizə orqanları ilə iş şöbəsinin müdiri Fuad Ələsgərov Azərbaycan prezidenti İlham Əliyevin konfrans iştirakçılarına müraciətini elan edib. Müraciətdə qeyd olunub ki, Azərbaycan soyqırım və etnik təmizləmə siyasəti nəticəsində 1 milyondan çox qaçqın və məcburi köçkünün kütləvi şəkildə pozulmuş hüquqlarının bərpa edilməsi, işğal olunan torpaqların azad edilməsi üçün sarsılmaz iradəsini və gücünü nümayiş etdirəcək: “Ümidvaram ki, ombudsmanlar və beynəlxalq təşkilatların nümayəndələri bu məsələlərə xüsusi diqqət yetirəcəklər və biz birlikdə insanların pozulan hüquqlarının bərpasına nail olcağıq”. Tədbirdə BMT-nin Azərbaycandakı rezident əlaqələndiricisi Bruno Pouezat BMT-nin İnsan Hüquqları Bəyannaməsinin qəbul olunmasının 60 illiyi ilə bağlı Azərbaycanda tədbirlər keçirilməsini yüksək qiymətləndirib. B. Pouezat Azərbaycanda bəyannamənin 5 minə yaxın nüsxəsinin yayıldığını bildirib. Millət vəkili Qənirə Paşayeva, Milli Məclisin şöbə müdiri Lətif Hüseynov tədbirdə məruzə ilə çıxış ediblər. Konfrans işini davam etdirir.

Azərbaycan_Ombudsman