Sosial

Ana səhifə

Sosial

AMEA-nın yeni Nizamnaməsinin layihəsi Ümumi yığıncağa tövsiyə edilib - YENİLƏNİB

23 sentyabr 2022 16:30 (UTC +04:00)

Sentyabrın 23-də AMEA-nın Rəyasət Heyətinin növbəti iclası keçirilib.

AMEA-dan APA-ya verilən xəbərə görə, iclasda AMEA-nın prezidenti v.i.e., akademik Arif Həşimov və Rəyasət Heyətinin digər üzvləri iştirak ediblər.

Akademik Arif Həşimov iclasın gündəliyi barədə Rəyasət Heyətinin üzvlərinə məlumat verib.

Tədbirdə müzakirəyə çıxarılan ilk məsələ AMEA-nın yeni Nizamnamə layihəsi haqqında olub. Məsələ ilə bağlı çıxış edən AMEA-nın vitse-prezidenti, Nizamnamə Komissiyasının sədri, akademik İsa Həbibbəyli dövlət başçısının “Azərbaycan Respublikasında elm və təhsil sahəsində idarəetmənin təkmilləşdirilməsi ilə bağlı bəzi tədbirlər haqqında” 28 iyul 2022-ci il tarixli Fərman imzaladığını xatırladıb. Qeyd edib ki, sözügedən sənədin icrasından irəli gələrək və Azərbaycan Respublikasının maraqları, milli prioritetləri və inkişaf strategiyası, dünya elminə inteqrasiya, elm və təhsilin qarşılıqlı əlaqəsi əsas götürülərək yeni çağırışlara cavab verən, AMEA-nın digər qurumlarla münasibətlərini tənzimləyən 14 maddə və 228 bənddən ibarət olan Akademiyanın yeni Nizamnaməsinin layihəsi hazırlanıb. Onun sözlərinə görə, yeni Nizamnamə layihəsində Akademiyanın strukturu, vəzifələri və hüquqları, Akademiyanın Ümumi yığıncağının, Rəyasət Heyətinin, elmi bölmələrin, regional elmi mərkəzlərin, elmi müəssisələrin fəaliyyət istiqamətləri, Akademiyaya seçkilər, elmi fəaliyyətin istiqamətləndirilməsi və s. kimi məsələlər əksini tapıb.

Həmçinin Humanitar və İctimai Elmləri əhatə etməklə dövlət ideologiyasının elmi əsaslarını müəyyən edən və cəmiyyətdə azərbaycançılıq düşüncəsinin, milli-mənəvi dəyərlərin inkişaf etdirilməsinə xidmət edən maddələrin də Nizamnamə layihəsində öz əksini tapdığı vurğulanıb.

İ.Həbibbəyli çıxışının sonunda qeyd edib ki, Akademiya ölkəmizin dövlət tərəfindən müəyyən edilmiş milli prioritetlərinə və inkişaf strategiyasına xidmət etməlidir və AMEA-nın bu əsasda yenidən qurulması zəruridir.

Məsələ ilə bağlı çıxış edən akademik Arif Həşimov bildirib ki, AMEA-nın yeni Nizamnaməsinə əsasən Akademiya Azərbaycan elminin dayanıqlılığı, dünya nailiyyətlərinə uyğun inkişafı, dövlətin elmi və elmi-texniki inkişafına uyğunlaşdırılması, elm sahəsində normativ hüquqi aktlara və dövlətin tərəfdaş çıxdığı sənədlərə rəylərin verilməsi, dövlət orqanlarının elmi müəssisələrinin istiqamətləndirilməsi üzrə məsləhət verən dövlətin akademik elmi təşkilatıdır. Akademik Arif Həşimov yeni Nizamnamənin AMEA-nın müasir dövrün çağırışlarına uyğun fəaliyyətini yenidən təşkil etməsində və ölkəmizdə aparılan tədqiqatların respublikamızın milli maraqlarına uyğunlaşmasında başlıca hüquqi sənədlərdən olacağını deyib və yeni Nizamnamənin layihəsinin baxılması üçün müvafiq dövlət orqanlarına göndəriləcəyini diqqətə çatdırıb.

Daha sonra akademiklər Rasim Əliquliyev, Tofiq Nağıyev, Adil Qəribov və Fikrət Əliyev çıxış edərək AMEA-nın yeni Nizamnamə layihəsi ilə bağlı fikir və təkliflərini səsləndiriblər.

AMEA-nın prezidenti v.i.e., akademik Arif Həşimov və Nizamnamə Komissiyasının sədri, akademik İsa Həbibbəyli səsləndirilən təkliflərə öz münasibətlərini bildiriblər.

Müzakirələrdən sonra Rəyasət Heyətinin qərarı ilə AMEA-nın yeni Nizamnaməsinin layihəsi Akademiyanın Ümumi yığıncağına tövsiyə edilib.

***

12:07

Azərbaycan Milli Elmlər Akademiyası (AMEA) Rəyasət Heyətinin iclası keçirilir.

APA xəbər verir ki, iclasda AMEA-nın yeni Nizamnaməsinin layihəsi müzakirə edilir.

AMEA Nizamnaməsinin layihəsi Rəyasət Heyətinin iclasında müzakirə edildikdən sonra Akademiyanın Ümumi yığıncağına təqdim olunacaq. Nizamnamə qaydalarına əsasən, AMEA-nın Nizamnaməsi Ümumi yığıncağın vəsatəti ilə Azərbaycan Respublikasının Prezidenti tərəfindən təsdiq edildikdən sonra qüvvəyə minir.

Qeyd edək ki, yeni Nizamnamə layihəsi Prezident Fərmanı əsasında Akademiyanın işinin və elmi fəaliyyətin yenidən təşkili ilə əlaqədar məsələləri, elmi-təşkilati proseslərin tənzimlənməsi mexanizmlərini əks etdirir. Yeni Nizamnamə layihəsi hazırlanarkən elmi tədqiqatların ölkəmizin dövlət tərəfindən müəyyən edilmiş milli prioritetlərinə və inkişaf strategiyasına uyğun şəkildə, dünya elminə inteqrasiya şəraitində təşkili və həyata keçirilməsi ilə əlaqədar müddəalar, habelə elm və təhsilin qarşılıqlı əlaqəsi ilə bağlı məsələlər əsas prinsip kimi qəbul olunub. Bütövlükdə 14 maddədən və 228 bənddən ibarət olan yeni Nizamnamə layihəsində Akademiyanın strukturu, vəzifələri və hüquqları, Akademiyanın Ümumi yığıncağının, Rəyasət Heyətinin, elmi bölmələrin, regional elmi mərkəzlərin, elmi müəssisələrin, elmi-xidmət müəssisələrinin fəaliyyət istiqamətləri müəyyən olunub, Akademiyaya seçkilərlə əlaqədar məsələlərə dair prosedurlar əhatə edilib. Layihədə Akademiyanın beynəlxalq əməkdaşlığının təşkili və tənzimlənməsinə aid müddəalar da özünə yer alıb.