Gürcüstanda “Caspian Energy Georgia”nın yaradılması müzakirə edilib

Gürcüstanda “Caspian Energy Georgia”nın yaradılması müzakirə edilib
# 21 avqust 2017 09:08 (UTC +04:00)

Gürcüstan hökumətinin nümayəndələri, Azərbaycanın Gürcüstandakı fövqəladə və səlahiyyətli səfiri, “Caspian European Club” və “Caspian Energy İnternational Group”un nümayəndə heyəti arasında görüş keçirilib. Görüşün əsas mövzusu “Caspian Energy Georgia”nın yaradılması olub.

“Caspian Energy İnternational Group”dan “APA-Economics”ə verilən məlumata görə, Azərbaycanın Gürcüstanın strateji partnyoru olduğunu qeyd edən Gürcüstanın baş nazirinin xarici əlaqələr üzrə müşaviri Tedo Caparidze birgə layihələrin yüksək templə həyata keçirildiyini xüsusilə vurğulayıb. Bildirilib ki, dövlət qurumları səviyyəsində qarşılıqlı anlaşma və möhkəm əməkdaşlıq Gürcüstan və Azərbaycanın özəl sektor nümayəndələri arasında sıx əlaqələrin qurulmasının zəruriliyini şərtləndirir. Gürcüstan hökumətinin “Caspian Energy Georgia”nın fəaliyyətinin yenilənməsini müsbət qarşıladığını qeyd edən T. Caparidze vurğulayıb ki, klub və media qrup həm regionda, həm də onun hüdudlarından kənarda tanınır. “Gürcüstan hökuməti “Caspian Energy Georgia”ya hər cür dəstək göstərəcək. Biz bugünkü əməkdaşlığımızdan çox məmnunuq”, - deyə baş nazirin müşaviri söyləyib. O qeyd edib ki, qarşıya qoyduqları əsas məqsədlərdən biri xarici bazarlara çıxış və qonşu ölkələrlə əlaqələrin inkişafıdır. T. Caparidze illik beynəlxalq “Caspian Energy Forum Tbilisi”nin yenidən işə başlamasının vacibliyini vurğulayıb.

Gürcüstan hökumətinin Azərbaycanla səmərəli əməkdaşlıqdakı fəal mövqeyini vurğulayan Azərbaycanın Gürcüstandakı fövqəladə və səlahiyyətli səfiri Dursun Həsənov “Caspian Energy Georgia”nın fəaliyyətinin bu əlaqələrin inkişafına böyük töhfə verəcəyinə əmin olduğunu ifadə edib. O, hökumət üzvlərini 2017-ci il sentyabrın 29-da başlayacaq biznes forumlarda və “CEO Lunch Tbilisi”də fəal iştirak etməyə dəvət edib. Qeyd edək ki, “CEO Lunch Tbilisi” hər ayın sonuncu cümə günü təşkil olunacaq.

“Maraqlıdır ki, “Caspian Enegy Georgia”nın yenidən fəaliyyətə başlaması Azərbaycanla Gürcüstan arasında diplomatik əlaqələrin qurulmasının 25 illik yubileyinə təsadüf edir”, - deyə səfir çıxışına yekun vurub.

Tədbir iştirakçılarına sıralarında dünyanın 50 ölkəsindən 5 min şirkət və təşkilatı birləşdirən “Caspian European Club”un 2002-ci ilin iyununda Xəzər-Qara dəniz regionunda fəaliyyət göstərən nəhəng neft-qaz şirkətlərinin dəstəyi ilə yaradıldığı barədə məlumat verilib: “Caspian European Club” dövlət qurumları ilə özəl sektor arasında dialoqa dəstək istiqamətində fəal iş aparır, həmçinin kiçik və orta biznesin, startapların inkişafı üzrə layihələrə informasiya və təşkilatı dəstək göstərir. “Caspian European Club”un sədri Azərbaycan prezidenti İlham Əliyevdir”.

“Caspian European Club” sədrinin birinci müavini və baş icraçı direktoru Telman Əliyev öz növbəsində “Caspian European Club” və “Caspian Energy İnternational Media Group”un fəaliyyətinə göstərilən dəstəyə görə Gürcüstan hökumətinə və Azərbaycanın Gürcüstandakı səfirliyinə minnətdarlığını bildirib.

Gürcüstanın baş nazirinin xarici əlaqələr üzrə müşaviri T. Çaparidzenin, Azərbaycanın Gürcüstandakı fövqəladə və səlahiyyətli səfiri D. Həsənovun, səfirin ikinci müavini Fəxri Hacıyevin, “Caspian European Club” və “Caspian American Club”un sədrinin birinci müavini və baş icraçı direktoru Telman Əliyevin və “Caspian Energy İnternational Media Group”un baş direktoru Rasim Mahmudovun iştirak etdiyi görüşdə həmçinin yaxın 5 il ərzində “Caspian Energy Georgia” çərçivəsində həyata keçiriləcək planlar və layihələr müzakirə olunub.

#
#

ƏMƏLİYYAT İCRA OLUNUR