Stolüstü oyunlar

Stolüstü oyunlar

Elman Rüstəmov Azərbaycan çempionatının qaliblərini mükafatlandırıb - FOTO

Elman Rüstəmov Azərbaycan çempionatının qaliblərini mükafatlandırıb - <font color=red>FOTO</font>

01 fevral 2011 15:37 (UTC +04:00)

Bakı – APA. Bu gün kişi və qadınlar arasında keçirilən şahmat üzrə Azərbaycan çempionatının qaliblərinin mükafatlandırma mərasimi keçirilib. Apasport.az saytının məlumatına görə, Mərkəzi Bankın inzibati binasında keçirilən tədbirdə mükafatçıları Şahmat Federasiyasının prezidenti Elman Rüstəmov təbrik edib.

Federasiya rəhbəri qaliblərin gərgin keçən mübarizədən sonra müəyyənləşdiyini bildirib. Daha sonra qadınlar arasında ölkə çempionatında ilk “üçlük”də qərarlaşan Türkan Məmmədyarova, Zeynəb Məmmədyarova və Gülnar Məmmədovaya medal, diplom və pul mükafatları təqdim olunub.

Mərasimdə kişilər arasında fəxri kürsüyə yüksələn Nicat Məmmədov, Rüfət Bağırov və Qədər Hüseynov da medallarına qovuşublar. Onlara medallarla yanaşı, pul mükafatı və diplomlar da verilib.

Sonra söz qaliblərə verilib. Qadınlar arasında birinci olan Türkan Məmmədyarova bildirib ki, Azərbaycanda qadın şahmatı ilbəil güclənir: “Bu il də yarış çox gərgin keçdi. Şahmatçılarımız nəticələrini yaxşılaşdırıblar. Azərbaycan çempionatında bu özünü göstərdi. Ümid edirəm ki, bu il Avropa çempionatında daha gözəl nəticələr göstərəcəyik”.

Kişilər arasındakı yarışda çempion adını qazanan Nicat Məmmədov isə uğurunun davamını gətirəcəyinə inanır: “Təbii ki, qalib gəldiyim üçün sevinirəm. Çempionatın son turları daha gərgin keçdi. Lakin yekunda qalib mən oldum. Bu qələbələri davam etdirəcəyəm. İnanıram ki, bunun ardı gələcək. Qızların yarışı isə bizdən tez qurtardı. Mükafata layiq yerlər tutanları təbrik edirəm. Medal qazanmayanlar da təəssüflənməsinlər. Çünki onları qarşıda daha ciddi turnirlər gözləyir”.