Bakı – APA. Aprel ayında Silahlı Qüvvələrimizin düşmən təxribatlarına cavab olaraq həyata keçirdiyi uğurlu əks-həmlə əməliyyatları, bir sıra strateji yüksəkliyi azad edərək nəzarətə götürməsi xalqımız tərəfindən böyük coşqu ilə qarşılanıb, dostlarımızın və dünyanın hər yerində yaşayan soydaşlarımızın sevincinə səbəb olub.
Son 10-15 ildə Azərbaycanda baş verən müsbət dəyişikliklər, əsasən də ordu quruculuğu sahəsində əldə etdiyimiz böyük uğurlar nəinki ölkəmizdə, hətta dünya miqyasında təqdir edilən hal kimi qiymətləndirilir. Dünyanın tanınmış siyasət adamları, politoloqlar, nüfuzlu ictimai təşkilatlar tez-tez Azərbaycanla bağlı açıqlamalar verir. Müsbət rəy verməklə, ölkəmizdə baş verən proseslərdən razılıq ifadə edir, qazanılan uğurlardan məmnunluqla danışırlar. Artıq çoxları Azərbaycanı güclü orduya malik etibarlı tərəfdaş, regionda söz sahibi olan dövlət, dinamik inkişaf edən ölkə olaraq dəyərləndirir. Sözsüz ki, bu ifadələrin arxasında Azərbaycan xalqının, Azərbaycan prezidentinin, Azərbaycan dövlətinin və Silahlı Qüvvələrimizin uzunmüddətli, məqsədyönlü işin dayandığı heç vaxt unudulmur.
Şəxsən bəzi proseslərdə iştirak etməsək də, əksər hadisələrin gözümüz qarşısında baş verdiyindən bu uğurlar haqqında ürəkdolusu danışmaq imkanımız var. Ötən əsrin 70-ci illərindən başlayan, Qurtuluş günündən sonra bərpa olunan quruculuq, ordumuzun yaranma və inkişaf etmə prosesi ölkəmizdə və xaricdə daim işıqlandırılıb, təbliğ olunub. Necə deyərlər, hər şey vətəndaşlarımızın, dünya ictimaiyyətinin gözü qabağında baş verib və vətənini, xalqını, sevən dövlətinin çiçəklənməsini istəyən hər kəs bu quruculuq işlərində, Silahlı Qüvvələrimizin qüdrətlənməsində imkanı, gücü çərçivəsində iştirak edib.
Vaxtilə ümummilli lider Heydər Əliyev dünyanın harasında olmasından asılı olmayaraq orada yaşayan soydaşlarımızla mütləq görüşər və həmişə bildirərdi ki, harada yaşamağımıza baxmayaraq, Azərbaycan hamımızın Vətənidir. Bu mənada hər kəs ölkəmizdə aparılan işlərdə iştirak etməli və Vətənimizin uğurlarına sevinməlidir. Lakin təəssüf və təəccüb doğuran odur ki, bəzi soydaşlarımız nəinki kömək edir, əksinə bizi istəməyən ermənipərəst qüvvələrin sifarişləri ilə görülən işlərə, əldə edilən uğurlara, ordumuzun qələbəsinə kölgə salmağa, qara yaxmağa səy göstərirlər. Düşməni başa düşmək olar. O, heç vaxt bizim yaxşı olmağımızı istəməz. Amma özümüzdən olub başqalarının baltasına sap olanları anlamaq bir az çətin olsa da, anlamağa çalışırıq. Hollandiya, Rusiya, Almaniya, Norveç, eləcə də ölkəmizdə bizimlə birlikdə yaşayan bəzi soydaşlarımızın Azərbaycan və Silahlı Qüvvələrimiz haqqında səsləndirdiyi qərəzli, iftira dolu, böhtan xarakterli fikirlər diqqət çəkəndir. İnsanın bu qədər kinli, qərəzli, dönük olması düşünməyə vadar edən məqamdır. Bəzilərini şəxsən, yaxşı tanımasaq da, bəziləri haqqında cəmiyyətimiz yetərincə məlumatlıdır. Müxtəlif tədbirlərdə, televiziyada, mətbuatda onları izləmək imkanımız olub. Yayılan bir sıra bəyanatları, yazıları oxuyarkən bir az duruxdum. Nə düşündüyümü bilmədiyimdən deyil, sadəcə özünü tanınmış, “təcrübəli”, mütəxəssis “ekspert”, “vətənsevər” hesab edənlərin belə sadə uşaq oyununa gəlməsindən “şaşırdım”. Düşündüm ki, “ağıldan bəla”, amma yerinə düşmədi, o “bəylərin” törətdikləri əməllər, həddən ziyadə gördüyü yaxşılıqlardan bəladır. Uzun illər müxtəlif postlar tutmuş, Azərbaycanın çörəyini yemiş, olmazın hörmətini görmüş, özlərinə yaxşı güzəran qurmuş adamların bu qədər dönük olması həqiqətən insanı şaşdırır və sarsıdır.
Sadiqlik, sədaqət mənəvi dəyərdir. Onu itirmək an məsələsi, bərpası isə illər tələb edər, bəlkə heç mümkün olmaz. Ömrünün çoxunu təbliğ və tərifdə keçirən adamın kimlərinsə puluna, malına uyaraq belə metamorfozaya uğraması da maraqlı faktdır. Unutmaq da olmaz ki, ancaq pul alıb varidat yığmaq xətrinə tərif deyən, təbliğ edən şəxs bir gün kimsə bir az artıq pul versə, onun sifarişi ilə dönük çıxaraq haqqı danacaq və bizləri böhtanlara qərq etməyə çalışacaq.
Yaxşı olardı ki, bu adamlar xaricdə yaşayarkən Azərbaycanın hesabına əldə etdiyi imkanlardan istifadə edərək, Vətənimizi, dövlətimizi, ordumuzu təbliğ etsinlər və düşmənlərlə mübarizədə soydaşlarımızın həmrəyliyinə yardımçı olsunlar. Heç olmasa bu yaxınlarda Almaniyada tanış olduğumuz sadə bir tərcüməçi işləyən soydaşımızın etdiyi kimi. Hər tədbirdən sonra o, çantasından Azərbaycana aid balaca bir suvenir çıxararaq, xaricilərə hədiyyə verirdi. Bizim maraqla baxdığımızı görəndə, “müəllim nə edim, mənim də gücüm buna çatır” dedi.
Bəli, hər kəs əlindən gələn nəsə bir yaxşı iş görsə, həm Vətənimizin, həm vətəndaşlarımızın dərdləri günbəgün azalar, yoxa çıxar, ölkəmiz, ordumuz günbəgün çiçəklənər qüdrətlənər, məncə. Tərcüməçi soydaşımızın axşam bir rəsmi şam yeməyində etdiyi hərəkəti də bizi çox mütəəssir etdi, duyğulandırdı. O, çantasından Azərbaycanın bayrağını da çıxarıb masanın üzərinə qoydu. Razılaşarsınız ki, çox az adam tapılar çantasında mənsub olduğu ölkənin bayrağını gəzdirsin.
Yetərincə düşmənimizin olduğu dövrdə, düşmən tərəfə keçməsələr də, bəzi soydaşlarımızın səsləndirdikləri fikirlər bizi sevməyənlərin sifarişi ilə düşmən dəyirmanına su tökməkdən, qarayaxmadan, böhtandan, iftiradan başqa bir şey deyil. Lakin sevindirici odur ki, xalqın gözü tərəzidir və onların səsləndirdiyi subyektiv fikirlər yaxşı işlərin, uğurlu addımların fonunda kölgədə qalır, təsirsiz olur.
Artıq inamla demək olar ki, heç bir qüvvə həmrəyliyimizi poza, müstəqilliyimizi sarsıda bilməz. Xalqın dəstəyinə arxalanan Azərbaycan prezidenti, Azərbaycan dövləti, uğurlu siyasətini, ordu islahatlarını, quruculuq işlərini, iqtisadi inkişafı inamla, əzmlə davam etdirir. Bütün bunlar dostlarımızı və dünyada yaşayan həmvətənlərimizi sevindirir. Dostlar sevinsin, düşmənlərimiz isə özü bilər. Biz düşmənə lazım olan cavabı verməyə həmişə hazırıq. Necə ki, aprelin əvvəlində düşmənə layiqli cavab verdik, xalqımızdan və cənab Ali Baş Komandandan da layiqli qiymətimizi aldıq.
İsa İsmayılov, hərbi jurnalist