Hadisə

Ana səhifə

Hadisə

Silahlı basqına məruz qalan şəxsin kimliyi bəlli olub

06 avqust 2008 19:13 (UTC +04:00)

APA-nın hadisə yerində olan əməkdaşının verdiyi məlumata görə, valyutadəyişmə məntəqəsinin basqına məruz qalan sahibi Qasımov Ruslan İsmayıl oğludur.

R. Qasımov hadisə yerində polislərə verdiyi ilkin ifadəsində bildirib ki, ona 4 nəfərdən ibarət dəstə hücum edib. R. Qasımova odlu silahla hədə-qorxu gələn dəstə üzvləri ona məxsus BMW markalı maşından külli miqdarda pulu aparıblar.

Daha sonra zərərçəkmiş Binəqədi Rayon Polis İdarəsinin 5-ci polis bölməsinə dəvət olunub və ondan sərbəst ifadə alınıb. Hələlik polis zərərçəkmişə dəyən ziyanın məbləğini açıqlamayıb.

Polisdəki mənbədən isə APA-ya bildirilib ki, basqınçılar hadisə yerinə “Mersedec” markalı 10 KX 584 markalı avtomobillə gəliblər. Məlum olub ki, həmin maşın da bir müddət öncə oğurlanıb və axtarışda olub.

Hadisəni törədən şəxslərin tapılması üçün Bakıda əməliyyat-axtarış tədbirləri keçirilir. Şəhərin müxtəlif istiqamətlərində silahlı polis postları qurulub. Şübhəli maşınlar yoxlanılır.

Bakı Şəhər Baş Polis İdarəsinin rəis müavini Yaşar Əliyev APA-ya açıqlamasında hadisə zamanı ölən və yaralananların olmadığını desə də, basqınçıların nə qədər pul apardığı barədə məlumat verməyib.