Bakı – APA. Ukrayna Rusiya Federasiyasından təbii qaz almağı dayandırıb.
APA-nın “censor.net” saytına istinadən verdiyi məlumata görə, bunu Ukraynanın baş naziri Arseni Yatsenyuk deyib. “Hökumətin qərarı ilə “Naftoqaz”a tapşırılıb ki, Rusiya qazını almağı dayandırsın. Rusiyalılar isə səhv salıblar: qazı onlar kəsmir, biz onlardan qaz almırıq”, - deyə o, söyləyib.
A. Yatsenyuk bildirib ki, avropalı tərəfdaşların təklif etdikləri qiymət Ukraynanın şərq qonşusunun qoyduğu qiymətdən sərfəlidir. O, cari ildə ölkədə ümumi qaz istehlakının 20% azaldığını da qeyd edib. Baş nazir bəyan edib ki, hökumətin məqsədi 10 il ərzində Ukraynanın enerji müstəqilliyinə tam nail olmaqdır.