İvane Cavaxişvili adına Tbilisi Dövlət Universiteti (TDU) və Avropa Akademiyası arasında əməkdaşlıq haqqında memorandum imzalanıb.
APA-nın Gürcüstan bürosunun məlumatına görə, TDU rektoru Giorgi Şarvaşidze və Avropa Akademiyasının prezidenti Zird Klutinqin imzaladığı sənədə əsasən, ali məktəbdə Avropa Akademiyasının regional nümayəndəliyi yaradılacaq.
2018-ci ilin sentyabrında fəaliyyətə başlayacaq nümayəndəlik Qafqaz regionunda elmi araşdırmaları təşviq edəcək. Gürcüstanla yanaşı Azərbaycan və Ermənistanı da əhatə edəcək nümayəndəlik gənc alimlərin elmi araşdırmalarını maliyyələşdirəcək.
Qeyd edək ki, 1988-ci ildə yaradılmış Avropa Akademiyası özündə fizika və texnologiyalar, bioloji elmlər və tibb, riyaziyyat, iqtisadiyyat, hüquq və digər elmi sahələr üzrə 3800 aparıcı alimi birləşdirir.