Xarici siyasət

Ana səhifə

Xarici siyasət

Sumqayıt hadisələrinə dair faktların əks olunduğu www.sumqait.com saytının təqdimatı keçirilib - FOTOSESSİYA

Sumqayıt hadisələrinə dair faktların əks olunduğu www.sumqait.com saytının təqdimatı keçirilib - <font color=red>FOTOSESSİYA</font>

28 fevral 2011 12:37 (UTC +04:00)

APA-nın məlumatına görə, 1988-ci ilin fevral ayında Sumqayıt şəhərində baş vermiş hadisələrə həsr olunmuş saytın təqdimatında Prezident Adminstrasiyasının Hüquq-mühafizə orqanları ilə iş şöbəsinin müdiri Fuad Ələsgərov, baş prokurorun birinci müavini Rüstəm Usubov, Milli Məclisin üzvləri, alimlər, ictimaiyyət nümayəndələri iştirak ediblər.

Tədbirdə çıxış edən F. Ələsgərov bildirib ki, ermənilər öz yalan və böhtan dolu materiallarını internetdə yerləşdirməklə bundan dünyada Azərbaycana qarşı istifadə edirlər, Sumqayıt hadisələrini isə “erməni soyqırımı” kimi təqdim etməyə çalışırlar. Sumqayıt hadisələri ilə bağlı cinayət işinin yeniləndiyini deyən F. Ələsgərov hadisələrdə başda Mixail Qorbaçov olmaqla o vaxtkı SSRİ rəhbərliyinin, ermənipərəst dairələrin və erməni millətçilərinin əli olduğunu vurğulayıb: “O vaxt DTK tərəfindən Sumqayıtda xüsusi əməliyyat planı hazırlanmışdı. Sınaqdan çıxarılmış bu ssenari sonradan digər bölgələrdə – Özbəkistan və Qırğızıstanda da tətbiq olundu”.

Şöbə müdirinin sözlərinə görə, cinayət işində yeni açılmış hallar onu göstərir ki, Sumqayıtda baş vermiş kütləvi iğtişaş Eduard Qriqoryan, onun iki qardaşı, Dağlıq Qarabağdan xüsusi tapşırıqlarla gəlmiş emissarlar və DTK-nın agentləri tərəfindən təşkil olunub: “Dağlıq Qarabağdan olan emissarlar Eduard Qriqoryanı ətraflı təlimatlandıraraq ona Sumqayıtda yaşayan və separatçıların yaratdığı “Qarabağ”, “Krunk” təşkilatlarına pul köçürməyən ermənilərin siyahısını və ev ünvanlarını veriblər. Bu emissarlar aqressivliyi artırmaq məqsədilə iğtişaş iştirakçılarına paylanması üçün Qriqoryanı psixotrop dərmanlar və spirtli içkilərlə təmin edib. Hadisələr zamanı isə bu şəxslər Eduard Qriqoryan və onun qardaşı Albert Qriqoryanla birlikdə camaata soyuq silah paylayıblar”.

F. Ələsgərov bildirib ki, aparılan təhqiqat zamanı talançıların hərəkət marşrutlarının əvvəlcədən müəyyən edildiyi və onların törətdiyi hərəkətlərin lentə alınaraq dərhal sonra xarici kanallarda yayımlandığı müəyyən olunub.

Saytın təqdimatını keçirən PA-nın Siyasi təhlil və informasiya təmiantı şöbəsinin böyük məsləhətçisi Fərhad Məmmədov qeyd edib ki, sayt yaradılmazdan əvvəl aparılan araşdırmalar zamanı Sumqayıtla bağlı domenlərin ermənilər tərəfindən alındığı bəlli olub. Buna görə də “www.sumqait.com”la birlikdə eyni adlı, sonluğu .org və .net-lə bitən domenlər də alınaraq hamısı eyni sayta yönləndirilib.

Daha sonra baş prokurorun müavini Rüstəm Usubov, millət vəkilləri Musa Qasımlı, Yaqub Mahmudov, vəkil Aslan İsmayılov və digər şəxslər çıxış ediblər. Tarixçi alim Yaqub Mahmudov bildirib ki, artıq ermənilərin azərbaycanlılara qarşı İrəvan mahalında, Gəncədə və Bakıda törətdiyi soyqırımlarla bağlı kitablar hazırlanır. Soyqırım faktları ilə bağlı yaxın vaxtlarda Respublika Prokurorluğunda müzakirələr aparılması nəzərdə tutulur.