Xarici siyasət

Ana səhifə

Xarici siyasət

ATƏT-in Bakı ofisinin 2007-ci il üçün fəaliyyətinin prioritetləri açıqlanıb

15 mart 2007 10:49 (UTC +04:00)

ATƏT-in Bakı ofisinin rəhbəri Xose Luis Herrero Ansola bu gün keçirdiyi mətbuat konfransında 2007-ci il ərzində görəcəkləri işlər və həyata keçirəcəkləri layihələr haqqında məlumat verib. APA-nın xəbərinə görə, ispaniyalı diplomat həm hökumət, həm də yerli institutlarla əməkdaşlığı və onlara dəstək verməyi davam etdirəcəklərini bildirib. Hərbi-siyasi sahədə görüləcək işlərdən danışan səfir artıq mövcud olan proqram üzrə fəaliyyətin davam etdiriləcəyini deyib. Bu proqramın əsas komponentləri Bakı Polis Akademiyasında təlim metodlarına yenidən baxılması, yol polisi üçün treninq kursu və Mingəçevirdə həyata keçirilən ictimai polis layihəsidir: “Biz vətəndaş cəmiyyəti ilə hərbçilər arasında qarşılıqlı əlaqənin qurulmasına, silahlı qüvvələr və polis üzərində demokratik nəzarətin güclənməsinə dəstəyimizi davam etdirəcəyik”. Herrero Ansola “Sərbəst toplaşmaq azadlığı haqqında” qanuna uyğun olaraq kütləvi tədbirlərdə polisin davranış metodları ilə bağlı Azərbaycanın regionlarında polislər üçün 3 treninq və 1 kurs keçiriləcəyini açıqlayıb.
İnsan hüquqları sahəsində atılacaq addımlar haqqında məlumat verən diplomat ofisin büdcəsi artdığından məhkəmə orqanları üçün xüsusi treninq keçirə biləcəklərini deyib. O, bu işlə bağlı ofisdə iki əlavə ştat yaradılacağını söyləyib. ATƏT siyasi partiyaların və qeyri-hökumət təşkilatlarının qeydiyyatı məsələsini də diqqətdə saxlayacaq, xarici təşkilatlarla birlikdə QHT şəbəkəsinin yaradılması və forumların keçirilməsinə kömək edəcək.
Media sahəsində isə ictimai televiziya və radionun inkişafına dəstək davam edəcək, yerli KİV orqanları ilə birgə onların texniki ehtiyacları müzakirə olunacaq.
Ofis istintaq təcridxanaları sisteminin inkişafı, trafikinqlə mübarizə, miqrasiya siyasəti sahəsində beynəlxalq əməkdaşlıq məsələlərində də hökumətə dəstəyini davam etdirəcək. Herrero Ansola Lənkəranda məişətdə qadın zorakılığı problemi ilə bağlı xüsusi mərkəz açılacağını da bildirib.
İqtisadi və ekoloji sahədə isə əsas diqqət ölkədə, xüsusən də rayonlarda sağlam biznes mühitinin inkişafına yönəldiləcək. Korrupsiya ilə mübarizənin çox vacib olduğunu vurğulayan ATƏT təmsilçisi sabah Şəkidə “Transparency-Azerbaijan” (“Şəffaflıq-Azərbaycan”) təşkilatının layihəsi əsasında Antikorrupsiya Mərkəzinin açılacağını söyləyib: “İqtisadi inkişafla təhlükəsizlik arasında sıx əlaqə var. Biz məhz buna görə daha şəffaf və işqabiliyyətli idarəçiliyin yaradılmasında hökuməti dəstəkləyirik”.
Səfir ekologiyanı də bu ilin prioritetləri sırasında göstərib. O, Orxus Ekoloji İnformasiya Mərkəzinin fəaliyyətinin genişləndiriləcəyini və Gəncə şəhərində də analoji mərkəzin yaradılacağını açıqlayıb. /APA/