Xarici siyasət

Ana səhifə

Xarici siyasət

İsrailin Azərbaycandakı səfiri Artur Lenk: “Azərbaycanla İsrail arasındakı münasibətlər strateji xarakter daşıyır”

27 iyun 2007 08:21 (UTC +04:00)

- Azərbaycanda iki illik fəaliyyətinizi necə qiymətləndirirsiniz?
- İki ildir Azərbaycandayam və bu ölkənin tədrici inkişafını müşahidə edirəm. Hər küncdə yeni bina tikilir, dövlət idarələri, mədəniyyət obyektləri təmir olunur. Azərbaycanın inkişaf və çiçəklənmə dövründə burada İsrail dövlətini təmsil etməyi özüm üçün böyük xoşbəxtlik sayıram.
- İki ölkə arasında qarşılıqlı əlaqələrin hazırkı səviyyəsini necə qiymətləndirirsiniz?
- Bu gün İsraillə Azərbaycan arasında siyasi və iqtisadi sahələrdə sıx əlaqələr mövcuddur. Bu günlərdə Azərbaycana yüksək texnologiyalar sahəsində çalışan 9 iri İsrail şirkətinin nümayəndə heyəti gəldi və biz Azərbaycanın Rabitə və İnformasiya Texnologiyaları Nazirliyi, həmçinin ölkənin iri rabitə şirkətləri ilə birlikdə forum keçirdik. Bu, yalnız bir nümunədir. Ən önəmlisi isə odur ki, İsrail Bakı-Tiflis-Ceyhan boru kəməri vasitəsilə Azərbaycandan neft alır. Bundan başqa, dövlətlərarası münasibətlər də getdikcə möhkəmlənir və iki ölkə nazirlikləri arasında qarşılıqlı səfərlər həyata keçirilir. Məsələn, bu ilin fevralında Azərbaycanın iqtisadi inkişaf naziri Heydər Babayev, apreldə Xarici Ölkələrdə Yaşayan Azərbaycanlılarla İş üzrə Dövlət Komitəsinin sədri Nazim İbrahimov, iki həftə əvvəl isə nəqliyyat naziri Ziya Məmmədov İsrailə səfər ediblər. İsrail tərəfdən isə ötən günlərdə XİN-in baş direktor müavini Yozef Qal Azərbaycanda səfərdə oldu. Baş nazirin müavinləri strateji planlaşdırma naziri Aviqdor Liberman və nəqliyyat naziri Şaul Mofaz isə bu ilin ikinci yarısında Azərbaycana gələcəklər. Bir çox strateji məsələlərdə bizim mövqelərimiz üst-üstə düşür. Hesab edirəm ki, Azərbaycanla İsrail arasındakı münasibətlər strateji xarakter daşıyır.
- Bu yaxınlarda yaradılmış İsrail-Azərbaycan Beynəlxalq Assosiasiyası haqda nə düşünürsünüz?
- Bu qurum Azərbaycan mənşəli bütün israilliləri birləşdirmək məqsədilə yaradılıb. Mən bu assosiasiyanı ən təbii və əsl dostluq körpüsü sayıram. Bu körpü nə İsrail dövləti, nə də Azərbaycan Respublikası tərəfindən yaradılıb, bu, insani bir körpüdür. Azərbaycandakı yəhudilər və Azərbaycandan İsrailə köçmüş insanlar iki ölkə münasibətlərinin bazisini təşkil edirlər və bu, hər cür biznesdən daha üstündür. Beynəlxalq aləmdə əməkdaşlıq etdiyimiz bir çox ölkə var ki, onların heç biri ilə aramızda Azərbaycanla olduğu kimi canlı, insani əlaqə yoxdur. Bu, Azərbaycanın yəhudilərə tolerant münasibəti ilə bağlıdır və biz bununla fəxr etməliyik. /APA/