Xarici siyasət

Ana səhifə

Xarici siyasət

İsrailin Azərbaycandakı səfiri İsrail-Azərbaycan Beynəlxalq Assosiasiyasının rəhbərliyi ilə görüşüb

30 iyul 2007 08:28 (UTC +04:00)

İsrailin Azərbaycandakı səfiri Artur Lenk Tel-Əvivdə İsrail-Azərbaycan Beynəlxalq Assosiasiyasının rəhbərliyi ilə görüşüb. APA-nın İsrail bürosunun xəbərinə görə, A. Lenk assosiasiyanı təbii dostluq körpüsü adlandıraraq bildirib ki, bu körpünü dövlətlər yox, insanlar yaradıb: “Mən inanıram ki, Azərbaycandakı yəhudilər və Azərbaycandan İsrailə köçən yəhudilər iki ölkə arasındakı münasibətlərdə bazis rolunu oynayacaq. Sizlər mənim İsraildəki lobbiçilərimsiniz”. Dövlətlərarası əlaqələrə toxunan səfir siyasi, iqtisadi və biznes sahələrində sıx əlaqələr qurulduğunu vurğulayıb. Onun sözlərinə görə, 2005-ci ildə ölkələr arasında ticarət dövriyyəsinin həcmi 5 milyon dollar olduğu halda, 2006-cı ildə bu miqdar 28 milyon dollara yüksəlib: “Ən önəmlisi odur ki, İsrail Bakı-Tiflis-Ceyhan boru kəməri vasitəsilə Azərbaycandan neft alır. Bundan başqa, qarşılıqlı əlaqələr də getdikcə möhkəmlənir və nazirlərin qarşılıqlı səfərləri artır”. Azərbaycan prezidenti ilə söhbətini xatırladan diplomat deyib ki, İlham Əliyev təkcə 2007-ci ilin ilk yarısında azərbaycanlı nazirlərin təxminən yarısının İsrailə səfər etdiyini söyləyib. A. Lenk bir çox strateji məsələlərdə Azərbaycanla İsrailin mövqelərinin üst-üstə düşdüyünü bəyan edərək iki ölkə münasibətlərinin strateji xarakter daşıdığını bildirib. /APA/