Xarici siyasət

Ana səhifə

Xarici siyasət

Yon Ramberq: “Ümidvarıq ki, Azərbaycanda keçiriləcək prezident seçkiləri demokratikləşmə yolunda növbəti addım olacaq”

26 sentyabr 2007 07:40 (UTC +04:00)

- Norveçlə Azərbaycan arasında iqtisadi sahədə əməkdaşlığın səviyyəsini necə qiymətləndirirsiniz?
- İki ölkə arasında iqtisadi əlaqələrin əsas sahəsini əlbəttə ki, neft sektoru təşkil edir. “Statoil” şirkəti Azərbaycanda fəaliyyət göstərən ikinci ən böyük sərmayədardır, bu şirkətin Azərbaycan iqtisadiyyatına qoyduğu sərmayənin həcmi 3 milyard dolları keçir. Bu sektorda digər neft şirkətləri də çalışırlar. Ölkələrimiz arasında əməkdaşlığın daha da inkişaf etdirilməsi üçün potensial hələ də mövcuddur, xüsusilə ticarət sahəsində mövcud olan potensialı qeyd etməliyəm. Hesab edirəm ki, Azərbaycanın Ümumdünya Ticarət Təşkilatına üzvlüyü bu mənada çox faydalı ola bilərdi.
- Yaxın zamanlarda Norveç biznes dairələrinin nümayəndələrinin Azərbaycana səfərinin təşkilində yardımçı ola bilərsinizmi?
- Bununla bağlı konkret planlar yoxdur, lakin iki ölkənin biznes dairələri arasında əlaqələrin inkişafına yardım göstərə biləcək bütün imkanlar öyrənilir.
Azərbaycanda demokratik mühiti, xüsusilə insan hüquqları və söz azadlığı sahəsində vəziyyəti necə dəyərləndirirsiniz?
- Norveç Avropa Şurasının üzvü olan Azərbaycanın demokratiyanın inkişafı, xüsusilə ali insan hüquqlarının təminatı sahəsində götürdüyü öhdəlikləri yerinə yetirməsi işini dəstəkləyir. Biz bilirik ki, bu, heç də asan yol deyil və Azərbaycanın tarixini də nəzərə alırıq. Bu sahədə, məsələn söz azadlığı sahəsində zaman-zaman problemlərin yaşanmasına təəssüf edirik, hansı ki, biz söz azadlığına tam demokratikləşmənin ayrılmaz hissəsi kimi baxırıq. Ümidvarıq ki, 2008-ci ildə Azərbaycanda keçiriləcək prezident seçkiləri demokratikləşmə yolunda tərəqqi kimi qiymətləndiriləcək və biz Azərbaycan hökumətinin bu əsasda Avroatlantika məkanına inteqrasiyasına köməklik göstərməyə hazırıq. İstərdik ki, ölkələrimiz arasında münasibətlər yalnız “energetika əsri”ndə şəffaf olmasın. Çünki, “energetika əsri” daimi deyil və münasibətlərimizin ümumbəşəri dəyərlər üzərində qurulmasını arzulayardıq.
- Bir çox beynəlxalq təşkilatların üzvü kimi Norveçin Ermənistan-Azərbaycan münaqişəsinin həlli məsələsinə dair mövqeyini bilmək maraqlı olardı...
- Norveç BMT Təhlükəsizlik Şurasının qətnamələrinə uyğun olaraq Azərbaycanın bütövlüyünü dəstəkləyir. Biz həmçinin ATƏT-in Minsk Qrupunun iki ölkə arasında münaqişənin sülh yolu ilə həllinə yönəlik cəhdlərini müsbət dəyərləndiririk. Digər tərəfdən Norveç Azərbaycan və Ermənistan nümayəndə heyətlərinin qarşılıqlı səfərlərini azərbaycanlı və erməni xalqları arasında etimadın möhkəmləndirilməsi və gərginliyin azaldılması istiqamətində ilk pozitiv addım kimi alqışlayırıq. /APA/