Xarici siyasət

Ana səhifə

Xarici siyasət

ABŞ-ın Azərbaycandakı səfiri: “Jurnalistlərə təzyiq göstərən, onları təhqir edən şəxslərin cəzalandırılmasını istəyirik”

01 oktyabr 2007 11:31 (UTC +04:00)

“Hər dəfə hansısa ölkədə peşə borcunu yerinə yetirən jurnalistin saxlanılması xəbərini eşidəndə, bundan narahat oluruq”. APA-nın məlumatına görə, bu sözləri “Yeni Müsavat” qəzetinin Naxçıvandakı bölgə müxbiri Həkimeldostu Mehdiyevin həbs olunması ilə bağlı jurnalistlərin suallarını cavablandıran ABŞ-ın Azərbaycandakı səfiri Ann Dersi deyib. A. Dersi qeyd edib ki, bu hadisədən sonra ABŞ səfirliyi iki əməkdaşını Naxçıvana ezam edib: “Onlar bu məsələ ilə maraqlanıblar və müvafiq şəxslərlə görüşüblər. Mənim Azərbaycan hökumətində olan həmkarlarım həmişə deyirlər ki, Azərbaycan qanunun aliliyinə ciddi riayət edən ölkə olmaq istəyir”. Səfir ABŞ hökumətinin söz və mətbuat azadlığı ilə bağlı mövqeyinin dəyişmədiyini vurğulayıb: “Biz hakimiyyətdən bu hadisələrin qarşısının alınmasını, jurnalistlərə təzyiq göstərən, onları təhqir edən şəxslərin cəzalandırılmasını istəyirik”.
ABŞ səfiri eyni zamanda 2008-ci ildə keçiriləcək prezident seçkilərinə də toxunub. Onun sözlərinə görə, bu seçkilər demokratiyanın növbəti mərhələsinə keçid üçün Azərbaycana əlverişli şərait yaradır: “Bu, təkcə Azərbaycana tərəfdaş ölkələrə deyil, ölkənin özünə lazımdır. ATƏT-in Demokrat Təsisatlar və İnsan Haqları Bürosu seçkilərin beynəlxalq standartlara uyğun keçirilməsi üçün müəyyən tövsiyələr, məsləhətlər verib. Hökumətin o məsləhətlərə riayət edərək müvafiq addımlar atması və tədbirlər həyata keçirməsi çox vacibdir”. /APA/