Hadisə

Ana səhifə

Hadisə

Xəzərdə vertolyotun qəzaya uğraması nəticəsində ölən 6 nəfərdən 4-nün cəsədinin axtarışı davam edir

15 oktyabr 2007 09:23 (UTC +04:00)

Bu barədə APA-ya “Azərbaycan Hava Yolları” Dövlət Konserninin mətbuat xidmətinin rəhbəri Məhərrəm Səfərli məlumat verib. Onun sözlərinə görə, axtarış tədbirləri itkin düşənlər tapılana kimi davam etdiriləcək. M. Səfərli eyni zamanda araşdırma prosesinin davam etdiyini də qeyd edib.
Dövlət Neft Şirkətinin mətbuat xidmətindən də APA-ya şirkətin bütün texnikasını axtarışlara cəlb edildiyi, hələlik heç bir nəticə olmadığı bildirib.
Hadisə ilə bağlı “AZAL” Dövlət Konserni, Fövqəladə Hallar Nazirliyi (FHN), Dövlət Neft Şirkəti (ARDNŞ), Dövlət Sərhəd Xidməti (DSX) və Baş Prokurorluğun birgə məlumatı yayılıb. Məlumatda bildirilib ki, 12 oktyabrı saat 21:30 radələrində “AZAL”ın “Azalheliokopters” müəssisəsinin balansında olan, ekipaj üzvləri təlimatçı-kapitan Viktor Qlinenko, kapitan Vladimir Nekrasov, 2-ci pilot Əhməd Əliyev, bort-mexanik Cahid İbrahimovun idarə etdiyi Mİ-8T tipli, 4K-25152 qeydiyyat nömrəli vertolyot ARDNŞ-nin “Xəzər-4” Üzən Qazma Qaldırıcı Qurğusunda çalışan, “Bayıl limanı” Kəşfiyyat Dəniz Qazma İdarəsinin əməkdaşı Əsədov Qəhrəman Soltan oğlunun səhhətində yaranmış problemlə əlaqədar təcili surətdə qurğuya çağırılıb, orada xəstəni və onu müşayiət edən iş yoldaşı Şaşkayev Zahid Cavad oğlunu bortuna götürərək, havaya qalxdıqdan az sonra, qəzaya uğrayaraq qurğudan 200 metr aralıda dənizə düşüb. Hadisə ilə bağlı dərhal FHN, ARDNŞ, DSX, “Azal”ın rəhbərlərindən ibarət operativ qərargah yaradılıb, qərargah bütün gecəni hadisə yerində işləyib, hadisə rayonu səhərə qədər xilasedicilərin nəzarəti altında olub. Həyata keçirilən tədbirlər nəticəsində vertolyotun düşdüyü yer müəyyən edilərək, dənizin 12 metr dərinliyindən V. Nekrasov və Ə. Əliyevin meyitləri və qəzaya uğrayan vertolyotun əsas bütöv hissəsi oktyabrın 13-də sudan çıxarılaraq, “Azalheliokopters” müəssisəsinin Zabrat qəsəbəsində yerləşən anqarına yerləşdirilib. Hazırda həlak olan digər 4 nəfərin cəsədlərinin tapılması məqsədilə “Azal”, FHN, ARDNŞ, DSX və Müdafiə Nazirliyinin qüvvələri tərəfindən vertolyotlar və digər xilasedici qurğular cəlb edilməklə fasiləsiz olaraq xilasetmə tədbirləri və axtarışlar həyata keçirilir. Azərbaycan Daxili İşlər və Fövqəladə Hallar nazirliklərinin əməkdaşları dənizin sahil zolağı boyunu daimi müşahidə altında saxlamaqla, müvafiq tədbirləri yerinə yetirirlər. Həyata keçirilən xilasetmə işləri və istintaq tədbirlərinin gedişi barədə mütəmadi olaraq dövlət başçısına məlumatlar verilir. Fakt üzrə Baş Prokurorluq tərəfindən Cinayət Məcəlləsinin 262.3-cü (hava nəqliyyatının hərəkət təhlükəsizliyi və istismarı qaydalarını pozma ) maddəsi ilə cinayət işi başlanılıb. İstintaqın gedişində hadisə yerinə və sudan çıxarılan vertolyota müvafiq qurumların ekspert, mütəxəssisləri dəvət edilməklə baxış keçirilib, vertolyotdan nitqi özüyazan və texniki məlumatı yığan qurğular aşkar edilərək götürülüb və həmin qurğular AZAL-ın xidməti təhqiqat üçün aviasiya hadisələrinin araşdırılması üzrə komissiyasına təqdim edilib. V. Nekrasov və Ə. Əliyevin meyitlərinin tanınması, məhkəmə-tibb ekspertizası təyin edilməklə məhkəmə-tibbi müayinəsi aparılıb, “Xəzər-4” Üzən Qazma Qaldırıcı Qurğusunda işləyən, hadisəni görən, eləcə də ekipaj üzvləri ilə əlaqə saxlayan dispetçerlər şahid qismində dindirilib, müvafiq sənədlər götürülüb. Cinayət İşinin istintaqını Baş Prokurorluğun Ağır Cinayətlərə Dair İşlər üzrə İstintaq İdarəsində aparılır, hadisənin baş vermə səbəbləri araşdırılır. /APA/