Bakı-APA. AFFA tərəfindən Bakının Nizami rayonu ərazisində tikilən “8 km stadionu” “Bakcell Arena” adlanacaq. Apasport.az saytının məlumatına görə, bu məqsədlə bu gün “Bakcell”in ofisində müqavilə imzalanıb. Müqaviləni şirkətin baş icraçı direktoru Riçard Şirer və AFFA-nın baş katibi Elxan Məmmədov imzalayıb.
Ümumi ərazisi 22 min 500 kv.m. olan stadionun tikintisinə 2010-cu ilin may ayında başlanıb. Beynəlxalq standartlara cavab verən arena qısa bir müddət ərzində istifadəyə verilib. “Bakcell”in də milli tərəfdaşı olduğu FİFA U-17 Qadınlararası Dünya Çempionatı Azərbaycan 2012-nin bir çox oyunu burada keçirilib. 11 min tamaşaçı yeri olan “Bakcell Arena” ümumi, media və VİP olmaqla üç giriş hissədən və beş sektordan ibarətdir. Tribunada ailə baxış və 17 skayboks VİP, tribunanın alt hissəsində komandaların istifadəsi üçün dörd soyunma-geyinmə, məşqçilər, hakimlər, həkimlər, mətbuat nümayəndələri üçün otaqlar və konfrans zalları, dopinq-nəzarət və digər otaqlar yerləşir. Stadionun 400 avtomobil tutan dayanacağı var.
Qeyd edək ki, “Bakcell Arena” stadionun adını əks etdirən lövhənin açılış mərasimi sabah saat 16:00-da keçiriləcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
