Bakı. Rəşad Süleymanov – APA. Varşavada Azərbaycan və Polşa arasında iqtisadi əməkdaşlıq üzrə hökumətlərarası komissiyanın növbəti - V iclası keçirilib. Bu barədə APA-ya Azərbaycanın Polşadakı səfirliyindən məlumat verilib.
İclasda və bu çərçivədə təşkil edilmiş biznes-forumda sənaye və energetika naziri Natiq Əliyevin rəhbərlik etdiyi nümayəndə heyəti və 20-yə yaxın iş adamı iştirak edib.
Polşa İqtisadiyyat Nazirliyində Azərbaycan və Polşadan olan, iqtisadiyyatın müxtəlif sahələrini təmsil edən iş adamlarının iştirakı ilə keçirilən biznes-forumda Azərbaycanda yaradılmış əlverişli biznes mühitinə dair prezentasiya olub. Forum çərçivəsində Azərbaycanın “Caspian Service” və Polşanın “Ulma Construction” şirkətləri arasında qarşılıqlı əməkdaşlığa dair anlaşma Memorandumu imzalanıb.
Komissiyanın V iclasının yekununa dair imzalanmış protokolda iqtisadiyyatın müxtəlif sahələri – energetika, nəqliyyat, kənd təsərrüfatı, turizm, bankçılıq və s. sahələr üzrə əməkdaşlığı inkişaf etdirmək üçün vəzifələr öz əksini tapıb.