Bakı. Könül Kamilqızı – APA. Səhiyyə Nazirliyində qurumun tabeçiliyində olan tibb müəssisələrində yanğından mühafizə qaydalarına, habelə payız - qış aylarına hazırlıq məsələlərinə həsr olunmuş iki günlük geniş müşavirə keçirilib. Nazirliyin mətbuat xidmətindən APA-ya verilən xəbərə görə, tədbirdə səhiyyə nazirinin müavini Elsevər Ağayev qeyd edib ki, son bir neçə il ərzində 500-dən artıq tibb müəssisəsinin yüksək standartlara uyğun qaydada əsaslı təmir və ya yeni tikilərək istifadəyə verilməsi, güclü kadr hazırlığı səhiyyə sektorunda görülən işlərin sübutudur. Nazir müavini deyib ki, xüsusi diqqət və nəzarət tələb edən məsələlərdən biri də yanğından mühafizədir. Bu günlərdə səhiyyə nazirinin tapşırığına əsasən, 1980 tibb müəssisəsində payız-qış mövsümünə hazırlığa dair tədbirlər keçirilib və hazırlığın səviyyəsi müzakirə olunub. Təkcə Bakı şəhəri üzrə 159 tibb müəssisəsindən 138-də yanğından mühafizə planı yoxlanılıb.
Fövqəladə Hallar Nazirliyinin Dövlət Yanğın Nəzarəti Xidmətinin əməkdaşı Elçin Hüseynov vurğulayıb ki, digər müəssisələr kimi Səhiyyə Nazirliyinin tərkibində olan müəssisələr də FHN-in xətti üzrə strateji əhəmiyyətli obyekt kimi qeydə alınır. Qeyd olunub ki, səhiyyə müəssisələrinin - klinika, poliklinika, doğum evləri, xəstəxana, körpələr evi, sanatoriya, istirahət evi, əczaxana, əczaxana anbarı və bu tipli başqa sosial obyektlərdə hər bir əməkdaş yanğından mühafizə qaydalarını mütləq bilməli, bu qaydalara ciddi nəzarət etməli və yanğın baş verdikdə insanların xilası, habelə yanğını söndürmək üçün ondan asılı olan bütün lazımi tədbirləri görməlidir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
