ABŞ Prezidenti Donald Tramp administrasiyasının İranla müharibə ilə bağlı əvvəl açıqladığı sərt hədəfləri tədricən yumşaltdığı görünür.
CNN xəbər verir ki, administrasiya əvvəlcə İranın tam təslim olması, rejim dəyişikliyi, Tehranın nüvə silahı əldə etməsinin qarşısının alınması və “Hizbullah” kimi regional qüvvələrə dəstəyin dayandırılması kimi məqsədlər irəli sürüb. Lakin müharibənin altıncı aya keçməsi ilə bu siyahı nəzərəçarpacaq dərəcədə dəyişib.
ABŞ vitse-prezidenti Cey Di Vens “Fox News”a müsahibəsində müharibənin başa çatması üçün iki əsas məqsədi açıqlayıb. Onun sözlərinə görə, birinci məqsəd Körfəz ölkələrindən dünya bazarına neft və qaz tədarükünün davam etməsi və enerji qiymətlərinin sabit saxlanmasıdır. İkinci məqsəd isə İranın nüvə silahı əldə etməsinə imkan verməməkdir.
Ağ Evin mətbuat katibi Karolin Livitt isə bildirib ki, hər iki məqsəd Tramp üçün eyni dərəcədə vacibdir.
Enerji qiymətlərinin aşağı saxlanılması əvvəllər administrasiyanın İran müharibəsi ilə bağlı əsas hədəfləri sırasında göstərilmirdi. Tramp may ayında amerikalıların maliyyə vəziyyətinin müharibə ilə bağlı qərarlarına təsir etmədiyini demişdi.
Son aylarda administrasiyanın digər tələbləri də arxa plana keçib. İranın zənginləşdirilmiş uranı təhvil verməsi, raket infrastrukturu və regional silahlı qruplara dəstəyin tam dayandırılması kimi əvvəlki şərtlər artıq daha az vurğulanır.
Vaşinqtonun enerji qiymətlərini “birinci məqsəd” kimi önə çıxarması Tramp administrasiyasının müharibəni ilkin hədəflərindən daha məhdud nəticələrlə başa vurmağa hazırlaşa biləcəyinə işarədir.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
