Amerika

Amerika

«20 yanvar» faciəsinin ildönümü Kanadada qeyd olunub

21 yanvar 2010 01:17 (UTC +04:00)

Bakı-APA. Azərbaycanın Kanadadakı Səfirliyi Torontoda «20 yanvar» faciəsi ilə əlaqədar tədbir keçirib. Səfirlikdən APA-ya verilən məlumata görə, tədbirdə Azərbaycan icmasının üzvləri ilə yanaşı Kanada Federal Parlamentinin üzvü, Kanada-Azərbaycan Parlamentlərarası Dostluq Qrupunun sədri xanım Yasmin Ratansi, Ontario Qanunvericilik Assambleyasının üzvü deputat Reza Moridi və Ontario Qanunvericilik Assambleyasının digər üzvü, Ontario İnvestisiya və Ticarət Məsləhət Şurasının sədri Monte Kvinter iştirak ediblər.

Tədbiri giriş sözü ilə Azərbaycanın Kanadadakı Səfiri Fərid Şəfiyev açaraq, «20 yanvar» faciəsi, faciənin tarixi və faciədən öncəki hadisələrdən danışıb. Səfir öz çıxışında faciə nəticəsində çoxlu sayda dinc Azərbaycanlı əhalinin 1990-cı il yanvarın 19-dan 20-nə keçən gecə Bakıya yeridilmiş Sovet ordu hissələri tərəfindən qətlə yetirildiyini qeyd edib. F.Şəfiyev 20 yanvar faciəsinin Azərbaycan üçün nə qədər faciəli olduğunu, lakin eyni zamanda Sovet rəhbərliyinin Azərbaycan xalqının iradəsini, milli azadlıq uğrunda mübarizə əzmini qıra bilmədiyini söyləyib.

Daha sonra, Kanada Federal Parlamentinin üzvü, Kanada-Azərbaycan Parlamentlərarası Dostluq Qrupunun sədri xanım Yasmin Ratansi çıxış edərək, «20 yanvar» faciəsinin törədilmiş ağır bir faciə olduğunu və şəhidlərin Azərbaycanın müstəqilliyi uğrunda öz canlarını qurban verdiyini bildirib. O həmçinin «20 yanvar» hadisələrindən dərhal sonra Azərbaycanın Ümummilli Lideri Heydər Əliyevin Sovet Hökumətinə qarşı cəsarətli çıxışını qeyd edib. Çıxışının sonunda millət vəkili hazırda Azərbaycanın bir müstəqil ölkə kimi regionda nümunəvi ölkəyə çevrildiyini xüsusilə vurğulayıb.

Daha sonra, Ontario Qanunvericilik Assambleyasının üzvü və Ontario İnvestisiya və Ticaret Məsləhət Şurasının sədri Monte Kvinter çıxış edərək Azərbaycan xalqına qarşı həyata keçirilmiş 20 yanvar qırğınını pisləyib. O, həmin hadisələrin nə qədər faciəvi olmasına baxmayaraq, bunun müstəqil Azərbaycanın əsasının qoyulmasında önəmli məqam olduğunu bildirib.

Sonuncu çıxışçı qismində Ontario Qanunvericilik Assambleyasının üzvü, deputat Reza Moridi çıxış edərək, 20 yanvar faciəsinin Azərbaycan xalqının yaşadığı yeganə hadisə olmadığını söyləyib. O xüsusilə, o vaxtkı Sovet dövlətinin rəhbəri Mixail Qorbaçovun «20 yanvar» faciəsini törətməkdə təqsirkar olduğunu və onun bu cinayətkar əməlinə görə bilavasitə məsuliyyətə cəlb edilməsinin mühüm olduğunu söyləyib.

Çıxışlar başa çatdıqdan sonra iştirakçılar «20 yanvar» faciəsi ilə əlaqədar sənədli filmə tamaşa ediblər.