Amerika

Amerika

Barak Obama: İrana qarşı yeni sanksiyaların hazırlanması prosesi sürətlə gedir

11 fevral 2010 03:04 (UTC +04:00)

Bakı-APA. İran nüvə proqramını inkişaf etdirdiyi bir vaxt ABŞ prezidenti Barak Obama İran hökumətinə qarşı yeni ciddi sanksiyalar paketinin hazırlandığını elan edib.

APA-nın «Amerikanın səsi» radio-stansiyasına istinadən verdiyi məlumata görə, Obama Tehran nüvə silahı istehsalına gətirib çıxara bilən bir proqram üzərində işlədiyini diqqətə çatdırıb.

Onun sözlərinə görə, İrana qarşı yeni sanksiyaların hazırlanması prosesi sürətlə gedir.

"Biz gələn bir neçə həftə ərzində onların beynəlxalq ictimaiyyətdən nə qədər təcrid olunduqlarına işarə edən mühüm sanksiyalar paketi üzərində işləyəcəyik", - deyə o bildirib.

Prezident Obama bunları İranın uranı daha yüksək səviyyədə zənginləşdirəcəyini elan etməsindən bir neçə saat sonra Ağ Evdə əvvəlcədən elan edilməmiş brifinq zamanı söyləyib. Tehran hökuməti nüvə proqramının dinc mahiyyət daşıdığını deməyə israr edir.

Dövlət başçısının sözlərinə görə, İran belə görünür, onun münasibətlərin yaxşılaşdırılması təklifini rədd edir.

Keçən il Beynəlxalq Atom Enerjisi agentliyi İranın özünün az səviyyədə zənginləşdirdiyi uranı prosesdən keçirilmək üçün xarici ölkəyə göndərməsi haqda təkliflə çıxış edib. Bu urandan sonra tibbi izotopların istehsalında istifadə edilməli idi.

Cənab Obama bildirib ki, Tehran qarışıq siqnallar göndərir, lakin aydındır ki, təklifi qəbul etmir. Onun sözlərinə görə, bu, İranın urandan hərbi məqsədlər üçün istifadə etmək istədiyinə işarədir. "Bu, bizə onu göstərir ki, onların nüvə proqramının yalnız mülki məqsədlərə xidmət etdiyini deməsinə baxmayaraq, əslində, onlar silahlanmaya gətirib çıxaran bir kurs götürməyə davam edirlər", - deyə o bildirib.

ABŞ və Fransa bildirib ki, İranın hərəkətləri onların BMT-nin Təhlükəsizlik Şurasında sanksiyaların dördüncü paketinin hazırlanması səylərini intensivləşdirməsindən başqa seçim qoymur. Çin əvvəllər İrana qarşı belə sanksiyaların əleyhinə çıxıb.

Prezident Obama deyib ki, diplomatiya üçün hələ yer qalır. "Biz indi əminik ki, beynəlxalq ictimaiyyət İranın bu sahədə özünü düzgün aparmadığı məsələsində birləşib. Biz sanksiyaların qəbul edilməsinə çalışdığımız zaman Çinin Təhlükəsizlik Şurasında necə fəaliyyət göstərməsini indi baxıb görəcəyik", - Ağ Evin rəhbəri bildirib.

Sanksiyaların əleyhinə çıxan Rusiya da bildirir ki, uranın zənginləşdirilməsinə dair yeni plan İranın məqsədlərindən şübhələnməyə əsas verir.

Cənab Obama Moskvanın mövqeyini dəyişməsindən razı qaldığını bildirib. "Fikrimcə, onlar tamamilə aydın görürlər ki, İran İranla beynəlxalq ictimaiyyət arasında həlli mümkün olan mübahisənin həllinə ciddi yanaşmır", - deyə ABŞ prezidenti bildirib.

Prezident Obama yeni sanksiyaların həyata keçirilməsi üçün müəyyən vaxt göstərməyib.