Sosial

Ana səhifə

Sosial

“Regional turizmin davamlı inkişaf prioritetləri” mövzusunda beynəlxalq elmi konfransı keçirilir

31 may 2016 09:16 (UTC +04:00)

Bakı-APA. Prezident İlham Əliyevin sərəncamı ilə təsdiq edilmiş “Azərbaycan gəncliyi 2011-2015-ci illərdə” Dövlət Proqramının icrası çərçivəsində Azərbaycan Respublikasının Prezidenti yanında Elmin İnkişafı Fondu tərəfindən keçirilmiş Gənc alim və mütəxəssislərin 3-cü qrant müsabiqəsinin qalibi olmuş qrant layihəsi əsasında “Regional turizmin davamlı inkişaf prioritetləri” mövzusunda Gənc alim və mütəxəssislərin beynəlxalq elmi konfransı keçirilir.

Elmin İnkişafı Fondunun mətbuat xidmətindən APA-ya verilən məlumata görə, iki gün davam edəcək konfransa Azərbaycan Turizm və Menecment Universiteti elmi-təşkilatı dəstək göstərir.

Konfransın keçirilməsində əsas məqsəd müasir dövrdə iqtisadiyyatın dinamik inkişaf edən aparıcı sahələrindən biri olan turizmin elmi əsaslarla inkişaf etdirilməsinə nail olmaqdır. Konfrans geniş turizm potensialına sahib regionların hərtərəfli inkişafına nail olmaq məqsədi ilə qabaqcıl turizm regionlarının təcrübələrinin və bu sahədə aparılmış elmi tədqiqatların nəticələrinin öyrənilməsi, Azərbaycanda və dünyada mövcud olan turizm regionlarının inkişafı və bu sektorda fəaliyyət göstərən müxtəlif təşkilatların fəaliyyətlərinin düzgün təşkil edilməsi, həmçinin turizm üzrə ixtisaslaşan alim və mütəxəssislərin elmi tədqiqatlarının təşviq edilməsi baxımından da böyük əhəmiyyət daşıyır.

Konfransda “Regional iqtisadi inkişafda turizm amili və regional turizmin davamlı inkişaf problemləri”; “Regional turizmin inkişafında yerli özünüidarəetmənin yeri və icma əsaslı turizmin regionların inkişafında rolu”; “Azərbaycanın regionlarında turizmin inkişaf perspektivləri və regional turizmin davamlı inkişafında inkişaf etmiş turizm regionlarının menecment təcrübələri”; “Regional turizmin logistik problemləri və regional turizmin inkişafında yeni marketinq meylləri”; “Mədəniyyətlərarası kommunikasiyanın inkişafında turizmin rolu” mövzularında məruzələr dinləniləcək.

Konfransın işində Azərbaycandan olan alim və mütəxəssislərlə yanaşı, Qazaxıstan, Özbəkistan, Gürcüstan və Ukraynadan da dəvətli məruzəçilər iştirak edir. Məruzələr sırasında Türkiyə və İngiltərədən təqdim olunmuş maraqlı işlər də var.