"Kanal-13" internet televiziyasının həbsdə olan icraçı direktoru Əziz Orucovun barəsində olan hökmdən verilən apellyasiya şikayəti üzrə məhkəmənin başlama vaxtı açıqlanıb.
Vəkil Cavad Cavadlının APA-ya verdiyi xəbərə görə, apelyasiya şikayəti üzrə məhkəmənin ilkin baxış iclası fevralın 6-na təyin edilib. Prosesə Bakı Apellyasiya Məhkəməsinin hakimi Əmir Bayramov sədrlik edəcək. Apellyasiya şikayətində Ə. Orucov barəsində bəraət hökmünü çıxarılması istənilib.
Ə. Orucov məhkəmə hökmü ilə 6 il müddətinə azadlıqdan məhrum edilib.
Qeyd edək ki, Əziz Orucov ötən mayın 2-də polisə müqavimət ittihamı ilə saxlanılıb, ona 30 sutka inzibati həbs cəzası verilib. Azadlığa buraxılmalı olduğu gün - iyunun 1-də Baş Prokurorluğun Ağır Cinayətlərə dair İşlər üzrə İstintaq İdarəsində haqqında cinayət işi başlanıb, ona Cinayət Məcəlləsinin 192-ci (qanunsuz sahibkarlıq) və 308-ci (vəzifə səlahiyyətlərindən sui-istifadə) maddələri ilə ittiham verilib. Elə həmin gün Nəsimi rayon Məhkəməsinin qərarı ilə onun barəsində 4 aylıq həbs-qətimkan tədbiri seçilib.
Ə. Orucov ittihamları qəbul etmir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
