Bakı. Viktoriya Dementyeva-APA. Azərbaycanın Rumıniyaya yeni təyin olunmuş səfiri Fərid Abdinbəyov etimadnaməsinin surətini strateji məsələlər üzrə dövlət katibi Boqdan Aureskuya təqdim edib. APA-nın məlumatına görə, görüşdə tərəflər ikitərəfli münasibətlərin gündəmində olan məsələləri müzakirə edib, yüksək səviyyəli siyasi dialoqun davam etdirilməsinin zəruriliyini vurğulayıblar.
Boqdan Auresku Rumıniyanın birgə biznes-forumların təşkili, iqtisadi heyətlərin səfərləri vasitəsilə Azərbaycanla iqtisadi sahədə əməkdaşlığı genişləndirməkdə maraqlı olduğunu deyib. O, Azərbaycan-Rumıniya hökumətlərarası komissiyasının növbəti iclasının keçirilməsinin vacibliyini önə çəkib.
Səfir öz növbəsində qeyd edib ki, Rumıniya baş nazirinin iyunun 27-də Azərbaycana səfəri iki ölkə arasında siyasi dialoqun yüksək səviyyədə olduğunu və tərəflərin bu əməkdaşlığı dərinləşdirməkdə maraqlı olduğunu göstərir. O, Rumıniyanın AB və NATO-da Azərbaycanın mühüm tərəfdaşı olduğunu bildirib.