Göyçay. Elvin Yaqubov - APA. Bu gün İqtisadi İnkişaf Nazirliyinin Sahibkarlığa Kömək Milli Fondu (SKMF) “Sahibkarlığın inkişafına dövlət dəstəyi” mövzusunda növbəti tədbirini Göyçay rayonunun Ləkçılpaq kəndində keçirib.
APA-nın məlumatına görə, tədbir çərçivəsində müvəkkil kredit təşkilatları vasitəsilə Göyçay və ətraf rayonlarda fəaliyyət göstərən 46 sahibkara 613 min manat güzəştli kredit verilib.
Bu kreditlər hesabına maliyyələşdirilən layihələr 80-ə yaxın yeni iş yerinin yaradılmasına imkan verir. 100-ə yaxın sahibkarın iştirakı ilə keçirilən tədbir çərçivəsində rayonun iqtisadi potensialının reallaşdırılması istiqamətində sahibkarlarla müzakirələr aparılıb, fond tərəfindən Göyçay rayonunda prioritet hesab olunan müasir heyvandarlıq kompleksinin, kiçik və orta həcmli çörək istehsalı müəssisəsinin, intensiv bağçılıq təsərrüfatlarının yaradılması üzrə hazırlanmış nümunəvi investisiya layihələri və metodiki materiallar sahibkarlara təqdim olunub.
Tədbirdə çıxış edən Göyçay rayon İcra Hakimiyyəti başçısının müavini Ədalət Dövlətov, İqtisadi İnkişaf Nazirliyinin sahibkarlığın inkişafı siyasəti şöbəsinin müdir müavini Elçin İbrahimov, nazirliyin Aran regional bölməsinin müdiri Elbrus Hüseynov Göyçay rayonunda görülən işlər, o cümlədən rayonun iqtisadi potensialının reallaşdırılması məqsədilə gələcəkdə həyata keçiriləcək tədbirlər, sahibkarlığın inkişafına göstərilən dövlət dəstəyi, eləcə də məqsədli dövlət proqramlarında rayon üzrə nəzərdə tutulan tədbirlər və onların icra vəziyyəti barədə məlumat veriblər.
SKMF-in icraçı direktoru Şirzad Abdullayev qeyd edib ki, bu ilin ötən dövrü ərzində fondun vəsaitləri hesabına respublika üzrə sahibkarlıq subyektlərinin 3634 investisiya layihəsinin maliyyələşdirilməsinə 246,7 milyon manat güzəştli kredit verilib ki, bu kreditlər hesabına 10 450-ə yaxın yeni iş yerinin yaradılması nəzərdə tutulur. Bildirilib ki, indiyədək Aran iqtisadi rayonunda fəaliyyət göstərən sahibkarlıq subyektlərinin 6750-dən çox investisiya layihəsinin maliyyələşdirilməsinə 305,7 milyon manat güzəştli kreditlər verilib.
Tədbirdə sahibkarları maraqlandıran suallar cavablandırılıb. Sonra tədbir iştirakçıları “Sahibkarlığın inkişafına dövlət dəstəyi” tədbiri çərçivəsində dövlətin güzəştli krediti ayrılmış Göyçay rayonundakı tutumu 2 min ton olan müasir soyuducu anbar kompleksinin və ildə 1,8 min ton quş əti istehsal edən quşçuluq təsərrüfatının fəaliyyətinə baxış keçirilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
