Bakı. Vüsal Nəbiyev - APA-Economics. Heydər Əliyevin anadan olmasının 92-ci ildönümü münasibəti ilə Əmək və Əhalinin Sosial Müdafiəsi Nazirliyinin (ƏƏSMN) struktur bölmələrinin əməkdaşlarından ibarət komandalar arasında keçirilən mini-futbol və mini-şahmat turnirinə yekun vurulub.
Nazirliyin İctimaiyyətlə əlaqələr şöbəsindən “APA-Economics”ə verilən məlumata görə, tədbirdə əmək və əhalinin sosial müdafiəsi naziri Səlim Müslümov Heydər Əliyevin Azərbaycan dövlətinin qurulması və inkişafı istiqamətində xidmətlərindən bəhs edərək əhalinin rifah halının yüksəldilməsinə xüsusi diqqət və qayğının artırılmasından söz açıb, bunun bir nümunəsi kimi, 1995-2003-cü illər ərzində ölkədə pensiya və müavinətlərin orta aylıq məbləğinin 8 dəfə artdığını qeyd edib.
“Ümummilli liderimiz Heydər Əliyevin müdrik siyasi kursunun 2003-cü ildən etibarən prezident İlham Əliyev tərəfindən yüksək səviyyədə davam və inkişaf etdirilməsi Azərbaycanın bütün sahələrdə möhtəşəm nailiyyətlər qazanmasına səbəb olub. Ölkəmizin sürətli inkişafı eyni zamanda sosial sahədə uğurlu addımların atılması ilə müşahidə olunur. Dövlət başçısı tərəfindən imzalanan fərman və sərəncamlar əhalinin, o cümlədən sosial cəhətdən həssas əhali qruplarının sosial müdafiəsinin gücləndirilməsində mühüm irəliləyişlərə şərait yaradıb. Son on ildə sosial müavinətlərin orta aylıq məbləği 2,6 dəfə, o cümlədən əlilliyə görə sosial müavinətlərin orta aylıq məbləği 8,1 dəfə, sağlamlıq imkanları məhdud uşaqlara ödənilən sosial müavinətin aylıq məbləği 7,4 dəfə, Azərbaycan prezidentinin fərdi təqaüdlərinin məbləği 5 dəfə, 2007-ci ildən şəhid ailələrinə verilən prezident təqaüdlərinin məbləği ötən müddətdə 2 dəfə artırılıb. Təkcə ötən il dövlət büdcəsindən sosialyönümlü xərclərə 9,9%, o cümlədən sosial müdafiə və sosial təminat xərclərinə 12,6% çox vəsait yönəldilib”, - deyə S. Müslümov bildirib.
Nazir bu gün Azərbaycanın sabitlik və inkişaf məkanı, müasir və tolerant ölkə olmaqla yanaşı, dünyada bir idman ölkəsi kimi də tanındığını qeyd edib: “Birinci Avropa Olimpiya Oyunlarının Azərbaycanda keçirilməsi ölkəmizin daim artan beynəlxalq nüfuzunun növbəti göstəricisidir. Gələn ay ölkəmizdə yüksək səviyyədə keçiriləcək ilk Avropa Olimpiya Oyunları Azərbaycanın bütün sahələrdə nə qədər sürətli inkişafa nail olduğunu dünyaya nümayiş etdirəcək”.
Tədbir idman yarışlarının qalibləri olan komandalara kubokun təqdim edilməsi ilə yekunlaşıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
