Asiya

Ana səhifə

Asiya

Qırğızıstana polis zabitləri göndəriləcək

22 iyul 2010 23:37 (UTC +04:00)

Bakı-APA. ATƏT-in Daimi Şurası Qırğızıstanda polis müşavirlərinin yerləşdirilməsinə qərar verib.
APA-nın bbc.com saytına istinadən verdiyi xəbərə görə, təşkilata sədrlik edən Qazaxıstan qərarı alqışlayıb və polis müşavirlərinin gecikdirilmədən göndərilməsini istəyib.
Qırğızıstanın təhlükəsizlik qüvvələrini təlimləndirmək və onların işini müşahidə etmək üçün ölkəyə polis məsləhətçilərini göndərmək təklifləri ilk dəfə olaraq ATƏT-in ötən həftə Almatıda keçirilən xarici işlər nazirləri səviyyəsindəki zirvə toplantısında səslənib. Vyanada Daimi Şura ATƏT-in ilk polis qrupunun orada yerləşdiriləcəyinə qərar verib. Bu qüvvəyə Polis Məşvərət Qrupu adı veriləcək. İlkin olaraq qrup əməliyyat başlayandan dörd ay müddətində orada yerləşdiriləcək. Missiyanın müddəti Qırğızıstanla Daimi Şura arasındakı razılaşmaya əsasən uzadıla bilər.
Qırğızıstanla Polis Məşvərət Qrupuna dair mövcud sazişdə ilkin olaraq 52 beynəlxalq polis zabitinin qırğız polis qüvvələrindəki həmkarlarına məsləhət verərək onlara təlim keçmələri nəzərdə tutulub. Əsas diqqət Qırğızıstanın cənubu olacaq. Onların nə silahları, nə də yüksək polis məsuliyyəti olmayacaq.
Qırğızıstanda müəyyən müxalifətə baxmayaraq, prezident ATƏT-in Polis Məşvərət Qrupunun yerləşdirilməsini alqışlayıb. Otunbayeva Rusiyadan olan jurnalistlərinə deyib ki, o, Qırğızıstanda beynəlxalq polis qüvvələrinin yerləşdirilməsinə inanır. Onun fikrincə, indiyə kimi onların özləri vətəndaşların hüquqlarını müdafiə edə bilməyiblər.
Qazaxıstanın ATƏT sədri üzv ölkələrə müraciət edərək qüvvələri gecikdirmədən yerləşdirməyə çağırıb ki, gərginlik regiona yayılmasın və münaqişədən sonrakı reabilitasiyaya nail olunsun. Qazaxıstanın Daimi Şuradakı sədri Kayrat Abdurrəhmanov bildirib ki, polis müşavirləri Qırğızıstan xalqını əmin etməkdə vacib rol oynayacaqlar və bu, polisin imkanlarını möhkəmlədərək ictimaiyyətin ona inamını bərpa etməyə yardım edəcək.
Qırğızıstana davam etməkdə olan böhranın öhdəsindən gəlməkdə daha bir ölkə yardım əlini uzadıb. İsveç hökuməti Aİ-nın Qırğızıstandakı öhdəliklərini gerçəkləşdirmək üçün əlavə işçi təqdim etməyə qərar verib. İsveçli Helena Vazkez Aİ-nın Orta Asiya üzrə xüsusi təmsilçisi Pyer Morelin siyasi müşaviri təyin edilib. Beynəlxalq İnkişaf Əməkdaşlığı üzrə nazir Gunilla Karlson deyib ki, beynəlxalq icma yardımı artırmalıdır ki, demokratik keçid davam edə bilsin. ATƏT, Aİ və BMT ilə birgə başqaları da insan haqlarının müdafiəsi, qanunun aliliyi və demokratiya məsələlərində öz mövqelərini nümayiş etdirərək rol oynayıblar.