Asiya

Ana səhifə

Asiya

İranda azərbaycanlıların keçirdiyi kütləvi aksiyalara polis müdaxilə edib, çoxlu sayda yaralanan və saxlanılan var

04 sentyabr 2011 10:01 (UTC +04:00)

APA-nın xəbərinə görə, aksiyalarda “Azərbaycan canımdır, Urmu gölü qanımdır!”, “Urmu gölü can verir, Məclis onun qətlinə fərman verir”, “Urmu gölü səslənir: “Susuzam, haray-haray!” kimi şüarlar səsləndirilib.

Təbrizin Bazar meydanı, şəhər icra hakimiyyətinin binası ilə Rastaküçə arasında, Əmin üçyolu, «Konkabaşı» və Bağqabağı marşrutu ilə keçirilən yürüşdə 10 mindən çox soydaşımız iştirak edib.

Aksiya zamanı polisin müdaxiləsi olub, dinc aksiya iştirakçısı olan qadınlar və uşaqlar saxlanılıb. Bəzi məlumatlara görə, polis müdaxiləsi zamanı 22 yaşlarında bir aksiyaçı öldürülüb.

Urmiyanın İmam, «Ətai», Besət, Cənubi Xəyyam, Kaşani xiyabanlarında, «Vilayəti-fəqih» və «Əyalət» meydanlarında da eyni vaxtda aksiyalar keçirilib. Sarab, Əhər, Meşkinşəhr şəhərlərində də yerli əhali Urmiya gölünün qurudulmasına hakimiyyətin laqeyd münasibətinə öz etirazını bildirib.

Tehrandakı soydaşlarımız bu etirazlara dəstək aksiyaları keçirmək üçün “İmam Hüseyn” və “Azadlıq” meydanlarında toplaşsalar da, polisin və ordu qüvvələrin müdaxiləsi ilə güc tətbiq edilib və aksiyanın keçrilməsinə imkan verilməyib. Meydanlar polis nəzarətinə götürülüb, polis aksiya iştirakçılarını dağıtmaq üçün gözyaşardıcı qazdan istifadə edib, dinc nümayişçilərə atəş açıb.

Hələlik yaralıların və saxlanılanların sayını dəqiqləşdirmək mümkün olmayıb.

Qeyd edək ki, aksiya iştirakçıları Urmiya gölünün məqsədyönlü qurudulması prosesinin dərhal dayandırılmasını, gölün qurumasının qarşısını almaq üçün təcili tədbirlər görülməsini, hökumət, parlament sədri və bəzi deputatların söylədikləri təhqirlərə görə, Azərbaycan xalqından üzr istəməsini tələb edirlər.

Tələblər sırasında Qərbi Azərbaycan əyalətinin valisinin istefaya göndərilməsi və məsuliyyətə cəlb olunması, dinc aksiyaçılara hücum edən polislərin cəzalandırılması, həbs olunanların sərbəst buraxılması, hökumət mediasında azərbaycanlıların təhqir edilməsi kampaniyasının dayandırılması, yerli əhalinin şəxsi təsərrüfatına dəymiş ziyanın ödənilməsi də var.
Qeyd edək ki, dünən Tehranın Ankaradakı səfirliyi qarşısında da Türkiyədəki Güney Azərbaycan türkləri Urmiya gölünün qurudulmasına etiraz olaraq aksiya keçiriblər. Sentyabrın 4-də isə İsveçin Gütenberg şəhərində də belə aksiyanın keçirilməsi gözlənilir.