Avropa

Ana səhifə

Avropa

Vahid Ərdəm: “”Ergenekon” məsələsi ilə bağlı hələ özüm üçün bir fikir hasil etməmişəm”

29 iyul 2008 12:01 (UTC +04:00)

- Türkiyədə cərəyan edən hadisələri necə qiymətləndirirsiniz? 22 iyul 2007-ci ildə keçirilən seçkidən sonra niyə Belə vəziyyət yarandı?

- Dörd il yarımlıq iqtidar dönəmindən sonra AKP 2007-ci ilin 22 iyulunda daha güclü şəkildə hakimiyyətə gəldi. Ancaq prezident seçkisindən sonra ölkədə vəziyyət yenidən gərginləşdi. Belə demək mümkünsə, Türkiyə öz içinə qapandı, xarici siyasət və qlobal iqtisadiyyat məsələlərinə üstünlük vermək yerinə, daxili siyasətdəki çəkişmələr ön plana çıxdı. Bu, təbii ki, üzüntü verici bir durumdur və tezliklə bu durumdan çıxmalıyıq. Çünki dünya çox sürətlə dəyişir və qiymətlərdə olan dalğalanmalar iqtisadiyyata mənfi təsir göstərir. Dünya iqtisadiyyatında bu proseslər cərəyan etdiyi halda, daxili siyasətdə çəkişmə yaratmaq səhvdir. Müxalifətimiz, iqtidarımız və dövlətin əlaqədar qurumları normal yola dönməlidir. Bu, mənim deyə biləcəyim ümumi şeylərdir. AKP-nin bağlanması məsələsinə gəldikdə, Konstitusiya Məhkəməsi sürətlə çalışır. İnanıram ki, məhkəmə bir neçə gün içində Türkiyəni çətin vəziyyətdə qoymayacaq qərar qəbul edəcək. Arzumuz budur ki, qərar Türkiyədəki sabitliyi pozmasın. Digər tərəfdən, oktyabrda “Ergenekon” adı verilən başqa bir məhkəmə prosesi başlayacaq. Bunun nə dərəcədə ciddi və üzərində durulması məsələ olduğunu zaman göstərəcək. Bu işin içində önəmli adamlar var. Mən bu işlə bağlı hələ ki özüm üçün bir fikir hasil etməmişəm. Bu məsələlər tezliklə nəticələnməli, hökumət öz enerjisini Türkiyənin dünya iqtisadiyyatına inteqrasiyasına və iqtisadi inkişafa sərf etməlidir. Xarici siyasətə xüsusi diqqət yetirməliyik. Davam edən məhkəmə prosesləri ilə bağlı daha artıq şey söyləmək doğru olmaz. Terrora qarşı mübarizə də Türkiyənin ən önəmli problemlərindən biridir. Türk Silahlı Qüvvələri terrorçuları müvəffəqiyyətlə neytrallaşdırır. Ancaq digər tərəfdən, terrorçular mülki əhalini hədəfə götürürlər. Bazar günü növbəti dəfə bunun şahidi olduq, 17 vətəndaşımız öldü, 100-dən çox yaralımız var. Terrorçular bilmədir ki, onlar bu yolla heç nəyə nail ola bilməyəcəklər. Türkiyə bu işlərin öhdəsindən xalqın birliyi və bərabərliyi ilə gələcək. Ölkəmizin birlik və bərabərliyini pozmaq və içəridə qarşıdurma yaratmaq istəyənlərə qarşı ayıq olmalıyıq.

- İki çağırışdır parlamentdəsiniz. Daha əvvəl türk ordusu ilə yaxın əməkdaşlıq şəraitində çalışmısınız, indi isə Məclisdə NATO qrupuna rəhbərlik edirsiniz. Türkiyə mediasının bir hissəsi terrora qarşı müvəffəqiyyətlə mübarizə aparan orduya sanki düşmən gözü ilə baxır. Bu barədə nə demək istərdiniz?

- Bütün dünyada olduğu kimi, Türkiyədə də medianın məsuliyyəti məsələsi çox mühümdür. Media ictimai fikrə təsir göstərən və əldə etdiyi bilgiləri ictimaiyyətlə bölüşən önəmli bir institutdur. Təbii ki, belə bir gücdən səhv istiqamətdə istifadə edilməsi ölkəyə ziyan vurur. Təəssüf ki, Türkiyədə medianın həmişə özünü məsuliyyətli apardığını söyləmək mümkün deyil. Mən əcnəbi medianı da tanıyıram. Məsələn, İngiltərə, Fransa və Almaniyada geniş media azadlığı var. Ancaq yeri gələndə onlar ölkələrinin mənafeyini ön plana çıxarırlar. Öz ölkələrinin mənafeyinə ziyan vuran materialları Qərb mediasında görə bilməzsiniz. Ancaq Türkiyə media orqanlarının çoxunda belə bir sərhəd yoxdur. Bunu normal qəbul etmək mümkün deyil. Heç kim media sərbəstliyindən öz ölkəsinin mənafeyi əleyhinə istifadə etməməlidir. Bizim mediamızda bu problem var. Nə şərtlə olursa-olsun, silahlı qüvvələrimizin medianın haqsız təzyiqi və böhtanı altında qalmasına icazə verə bilmərik. Çünki təhlükəsizliyi təmin edən qurumlar dövlətin davamlılığı baxımından həyati əhəmiyyətə malikdir. Min illik türk dövlətçilik tarixində millətimizin qəlbində ordumuzun həmişə müstəsna yeri olub. Biz çətin coğrafiyada yaşayırıq. Təhlükəsizlik qüvvələrimizin etimad krediti həmişə yüksək olmalıdır. Onlara qarşı yönəlmiş hər cür təhrikə və təxribata millət olaraq hamımız qarşı çıxmalıyıq.