Avropa

Ana səhifə

Avropa

İsveç Dövlət Müdafiə Tədqiqatları İnstitutu: “Rusiya mətbuatının bizim hesabata istinadən yaydığı məlumatlar uydurmadır”

26 sentyabr 2008 11:13 (UTC +04:00)

Stokholm. Zaur Həsənov-APA. İsveç Dövlət Müdafiə Tədqiqatları İnstitutu son zamanlar Rusiya kütləvi informasiya vasitələrində bu qurumun adından yayılan bəyanatları təkzib edib. İnstitutdan APA-ya verilən açıqlamaya görə, Rusiya mətbuatı, daha sonra isə digər mətbuat orqanlarının İsveç Dövlət Müdafiə Tədqiqatları İnstitutuna istinadən yayılan xəbəri təhrif ediblər.

Qeyd edək ki, bir neçə gün öncə Rusiya kütləvi informasiya vasitələrində İsveç Dövlət Müdafiə Tədqiqatları İnstitutu adından Gürcüstanın Cənubi Osetiyaya hücum planının İsrailli general Qal Xirş tərəfindən hazırlanması barədə məlumat yayılıb: “Halbuki agentliyin hesabatında heç bir İsrailli generalın adı göstərilməyib. Həmçinin bəyan edirik ki, Rusiya mətbuatının bəyan etdiyi kimi 1000-ə yaxın İsrailli əsgərlərin Gürcüstan-Rusiya müharibəsində iştirak etməsi barədə yayılan məlumatlar da uydurmadır. Hesabatda tamamilə başqa fikir çatdırılır. Daha konkret olaraq isə qeyd olunan araşdırmada yazılıb ki, son illər kifayət qədər böyük həcimdə xarici hərbi və mülki məsləhətçilər, o cümlədən İsrail hərbi mütəxəssisləri Gürcüstanda aktiv fəaliyyət göstəriblər. İsrail məsləhətçiləri ölkənin özəl şirkətlərini təmsil edir, Gürcüstan ordusuna, həmçinin Gürcüstan dövlətinin kəşfiyyat və təhlükəsizlik orqanlarına təlim keçirdilər. İsrailli mütəxəssislərin dəqiq sayı bilinmir. Lakin Gürcüstanda bir neçə yüz, bəlkə də minə qədər ölkədən hərbi təlimatçı olub. Ola bilsin ki, bu təlimatçılardan bir neçəsi atışmada iştirak edib. Amma İsrail məsləhətçilərin döyüşdə iştirak etmə ehtimalının savaşın gedişinə təsir etməsi böyük şübhələr doğurur".

İnstitutdan bildirilib ki, Rusiya mətbuatında bu quruma istinadən yayılan səhv məlumatlar bununla bitmir. Belə ki, məqalələrdə qeyd olunub ki, guya İsraillə Gürcüstanın yaxınlığı onunla bağlıdır ki, gələcəkdə İsrail Gürcüstanın 2 hava limanından istifadə edərək İranın nüvə obyektlərinə hücum edəcək. Lakin agentliyin APA-ya verdiyi açıqlamaya görə, onların hazırladığı hesabatda belə məlumat yer tapmayıb: “Rusiya mətbuatında hesabata "istinadən" yayılan daha bir qeyri-dəqiq məlumat onunla bağlıdır ki, "İsrail Azərbaycanda istehsal olunan neftin 20 faizini alır. Qara qızıl Bakı-Tiflis-Ceyhan əsas ixrac kəməri vasitəsilə Adana limanına çatdırılır və İsrail bu kəmərin fəaliyyətində işlənməsində maraqlıdır. Halbuki hesabatda heç bir konkret rəqəmlərdən və İsraillə enerji əlaqələr barədə heç nə yazılmayıb”.