Avropa

Ana səhifə

Avropa

Türkiyə parlamentində deputatlar arasında yumruq davası düşüb - FOTOSESSİYA

Türkiyə parlamentində deputatlar arasında yumruq davası düşüb - <font color=red>FOTOSESSİYA</font>

03 fevral 2010 08:13 (UTC +04:00)

APA-nın Türkiyə mətbuatına istinadən verdiyi məlumata görə, əmək və sosial təminat naziri Ömər Dinçərin vəzifədən kənarlaşdırılması haqqında Milliyyətçi Hərəkat Partiyasından (MHP) Osman Durmuş tərəfindən verilən təklifin müzakirəsi zamanı millət vəkilləri arasında qarşıdurma yaranıb.

Sabiq səhiyyə naziri O. Durmuş çıxışında Gülhanə Hərbi Tibb Akademiyasında müalicə olunan məşhur aktyor Nejat Uyğuru ziyarət etmək istəyən baş nazir Rəcəb Tayyib Ərdoğanın həyat yoldaşının başı örtülü olduğu üçün xəstəxanaya buraxılmaması məsələsini ironik tərzdə şərh edib: “Nejat Uyğuru ziyarət etmək istəyən xanım əfəndiyə “Gülhanəyə gəlməyin” deyiblər. Axxx, bəyaz önlüklülər, siz özünüzü nə hesab edirsiniz? Peyğəmbər adlandırılan bir baş nazirin xanımını necə qəbul etmirsiniz? 3-5 quruş pulunuzamı güvənirsiniz? Sizin klinikalarınızı bağlayarlar, görərsiniz”.

Bu sözlərdən sonra ara qarışıb. Ədalət və İnkişaf Partiyası (AKP) fraksiyasının həmsədri Bəkir Bozdağ Osman Durmuşa etirazını bildirib. Sonra baş nazir Ərdoğan söz alaraq kürsüyə çıxıb. O, həyat yoldaşına söz atıldığını deyərək bunu ədəbsizlik və əxlaqsızlıq adlandırıb. Ayağa qalxaraq buna etiraz edən MHP üzvləri ilə AKP üzvləri arasında əlbəyaxa dava başlayıb. Toplantıya sədrlik edən parlament sədrinin müavini, Cümhuriyyət Xalq Partiyasının üzvü Güldal Mumcu fasilə elan edib. R. T. Ərdoğan öz millət vəkillərinin əhatəsində salondan çıxarılıb. Qarşıdurma zamanı iki millət vəkilinin eynəyi sınıb, bəzi parlamentarlar həmkarlarından yumruq zərbələri alıblar. Bayılan AKP millət vəkili Əli Qoyunçu xəstəxanaya aparılıb. Onu səhhəti qənaətbəxşdir.

Fasilə zamanı G. Mumcunun kabinetinə daxil olan baş nazirin müavini, parlamentin keçmiş sədri Bülənt Arınç onu parlamenti idarə edə bilməməkdə günahlandırıb:

- Bu cür parlament idarə edərlər?! Bu qədər tərəfkeşlik olmaz.

- Parlamenti necə idarə edəcəyimi sizdənmi soruşacağam? Mən tamamilə tərəfsiz şəkildə iclasları idarə edirəm. Şikayətiniz varsa, reqlament çərçivəsində hərəkət edə bilərsiniz. Burada mənə hücum etməyə və həqarət etməyə haqqınız yoxdur!

Daha sonra otağa AKP fraksiyasının həmsədri Mustafa Elitaş girib. O da xanım Mumcunun üstünə qışqırıb. Otaqdakı MHP üzvü, parlamentin katibi Murat Özkan “bağırma. Bura bağırılacaq yer deyil”, deyə M. Elitaşın qarşısını kəsib. Başqa bir AKP üzvü araya girərək onları ayırıb. İnsidentdən sonra G. Mumcu protest əlamət olaraq kürsüyə çıxmayıb. Baş nazirin müavini, hökumət sözçüsü Cəmil Çiçək G. Mumcunun otağına gedərək baş verənlərə görə öz partiyadaşları adından ondan üzr istəyib. Bundan sonra iclas zalına daxil olan. G. Mumcu qısa bəyanatla çıxış edib: “Bildiyimə görə, Türkiyə qanunverici, icra və məhkəmə hakimiyyətlərinin müstəqilliyi əsasında idarə olunur. Hazırda mən burada qanunverici hakimiyyəti təmsil edirəm. İcra hakimiyyətinin qanunverici hakimiyyətə təzyiq göstərmək hüququ yoxdur. Bir nazir otağıma gəlib mənə təlimat vermək istədi. Bunu qətiyyətlə pisləyirəm”.

Qeyd: Fotolar “Milliyet” qəzetinin saytından götürülüb.

AKP_CHP_MHP