Avropa

Ana səhifə

Avropa

İngiltərə parlamentinin dörd deputatı dövlət vəsaitini israf etməkdə günahlandırılır

06 fevral 2010 03:44 (UTC +04:00)

Bakı-APA. Böyük Britaniyanın Kral Prokurorluq Xidməti ölkə parlamentinin icmalar palatasının üç üzvünə və lordlar palatasının bir üzvünə qarşı dövlət vəsaitlərinin israfçılığı ilə bağlı ittiham irəli sürüb. Bu barədə APA vesti.kz-ya istinadən xəbər verir.

Qurumun rəhbəri Kir Starmerin sözlərinə görə, dörd halda dəlillər həmin şəxslərə qarşı əməllərində cinayət tərkibi olması səbəbi ilə ittiham irəli sürülüb: «Beləliklə, həmin şəxslər Vestminster rayonunun magistr məhkəməsinə gəlmək barədə bildiriş alacaqlar».

Qeyd edək ki, keçmiş nazir müavini Elliot Morliyə qarşı ümumi məbləği 30 min funt (47 min dollar) olan iki ittiham irəli sürüləcək. Sən demə, deputat artıq ödənilmiş ipoteka borcu üçün vəsaitləri silməkdə davam edirmiş.

Digər millət vəkili Devid Çeytor isə vəsaitlərin IT xidmətlərə qeyri-məqsədəuyğun xərclənməsində, habelə dövlət hesabına icazəsiz daşınmaz əmlak icarə götürməkdə günahlandırılır.

Bundan əlavə, İcmalar Palatasının daha bir üzvü Cim Devin və Lordlar Palatasının üzvü lord Heninqfildə qarşı da ittiham irəli sürülüb. Polis lord Henniqfildi yaşamadığı mehmanxana nömrələrinin pulunu ödəməkdə ittiham edir.

Bütün ittiham olunanlar 7 il müddətinə azadlıqdan məhrum edilə bilərlər.

İttiham səsləndirildikdən dərhal sonra lord Henninqfild Lordlar palatasında yerini tərk etməsi barədə bəyanat verib. İttiham olunanlar hamısı birgə bəyanat tərtib edərək ittihamları inkar ediblər.

Qeyd edək ki, polis ötən ilin may ayından etibarən, parlamentarilərin xərcləri barədə məlumatlar KİV-də işıqlandırıldıqdan sonra bu təhqiqata başlayıb. Həmin vaxt dövlət vəsaitlərinin qeyri-düzgün istifadəsində deputatların yarıdan çoxu ittiham olunurdu.

Maliyyə xərcləri üzrə parlament komitəsinin məlumatına görə, ümumilikdə deputatlar dövlət xəzinəsinə 1,1 milyon funt (1,7 milyon dollar) qaytarmalıdırlar.