Avropa

Ana səhifə

Avropa

Bu gün Avropa Şurasının Yerli və Regional hakimiyyətləri Konqresi 21-ci plenar sessiyası öz işinə başlayır

18 oktyabr 2011 03:50 (UTC +04:00)

Strasburq. Fuad Qulubəyli-APA. Avropa Şurasının Yerli və Regional hakimiyyətləri Konqresinin 18-20 oktyabrda keçiriləcək sessiyasında birlikdə ləyaqətlə yaşamaq, yerli səviyyədə sosial həmrəylik, vətəndaş iştirakı və yerli səviyyədə insan hüquqlarına dair maarifləndirmə kimi əsas mövzular müzakirə ediləcək.

Avropa ölkələrində yaşayan qaraçılara qarşı edilən ayrı-seçkiliyin qarşısının alınması, uşaqlara qarşı seksual sui-istifadəylə mübarizə, son zamanlar Avropanın bir çox şəhərlərində baş verən iğtişaşlar və zorakılıqlar, vətəndaşların yerli və regional səviyyədə iştirakı və demokratik vətəndaşlığın aşılanmasında şəhər orqanlarının vasitələri kimi məsələlərini də Konqres öz sessiyasının gündəliyinə daxil edib. Eyni zamanda, Konqres hər il oktyabr ayında olduğu kimi, bu dəfə də Avropa yerli demokratiyası həftəsini qeyd edəcək. Şəhər və vilayətlərdə insan hüquqlarının yayılması mövzusunda müxtəlif görüşlər və müzakirələr aparılacaq. Konqresin üzv ölkələrdə apardığı monitorinqlərin nəticələri də açıqlanacaq. Serbiya, Sloveniya, Finlandiya, Latviya və Bolqarıstanda yerli və regional demokratiyanın vəziyyətinə dair bir neçə hesabat dinləniləcək və bu il ərzində Albaniya və Moldovadakı keçirilmiş seçkilərin nəticələri də sessiyada müzakirə ediləcək. Sessiyanın son günündə yerli və regional səviyyədə təchizat və energetika səmərəliyinə dair məsələlər də müzakirə olunacaq və Rusiyanın energetika naziri Sergey Şmatko konqres iştirakçıları qarşısında çıxış edəcək.
Bundan başqa, Konqresin bu sessiyası ərzində Avropa Şurasının baş katibi Tyorbörn Yaqland, Avropa Şurası Parlament Assambleyasının sədri Mövlud Çavuşoğlu, Ukraynanın Avropa Şurası Nazirlər Komitəsinə sədrliyi çərçivəsində, bu ölkənin Regional İnkişaf və İnşaat naziri Anatoliy Bliznyuk, İtaliyanın Turin şəhərinin meri Pyero Fassino və Ermənistanın Ərazi Planlaşdırma naziri Armen Gevorqyan da çıxış edəcəklər.