Avropa

Ana səhifə

Avropa

Praqada Azərbaycanın müstəqilliyinin bərpasının 20-ci ildönümü münasibətilə “dəyirmi masa” keçirilib

19 oktyabr 2011 02:08 (UTC +04:00)

Bakı-APA. Praqada Azərbaycan səfirliyi və Azərbaycan və Xəzər araşdırmaları mərkəzi müstəqilliyimizin bərpasının 20-ci ildönümü münasibətilə “dəyirmi masa” keçirib.
APA-nın AzərTac agentliyinə istinadən verdiyi xəbərə görə, tədbirdə Azərbaycanın Çexiyadakı səfirliyinin əməkdaşları, Çexiya parlamenti nümayəndələri, Çexiya-Azərbaycan parlamentlərarası dostluq qrupunun üzvləri, Çexiyada akkreditə olunmuş diplomatik missiyaların rəhbərləri və əməkdaşları, Gürcüstan, Belarus, Polşa, Moldova, Türkiyə, Ukraynanın bu ölkədəki səfirləri, Çexiya elm və siyasi dairələrinin nümayəndələri, digər rəsmi şəxslər iştirak ediblər.
Tədbiri açan səfir T.Tağızadə Azərbaycanın 1991-ci il oktyabrın 18-də müstəqilliyini bərpa etdiyini bildirib, ötən 20 ildə ölkənin sürətli inkişaf yolu keçdiyini vurğulayıb, müstəqil Azərbaycanın qarşısında duran əsas problemin Ermənistanın işğalı altında olan 20% torpaqlarımızın azad edilməsinin, o cümlədən Dağlıq Qarabağ regionunda suverenliyin bərpasının olduğunu söyləyib.
Çexiya parlamentinin deputatı Yan Hamaçek çıxışında Azərbaycan ilə Çexiya arasında əlaqələrin intensiv inkişafını, iki ölkə arasında əlaqələrin təkcə enerji ilə məhdudlaşmadığını, turizm, mədəniyyət, tələbə mübadiləsi sahələrində də inkişafın sürətləndiyini qeyd edib. Y.Hamaçek Azərbaycanı müstəqilliyinin bərpasının 20-ci ildönümü münasibətilə bir daha təbrik etmiş və Karl universitetində yeni açılan Azərbaycan və Xəzər araşdırmaları mərkəzinin fəaliyyətinə uğurlar diləyib.
Tədbir Azərbaycan mətbəxinin nümunələrindən ibarət ziyafətlə yekunlaşıb. Tədbirdən sonra Azərbaycan səfiri T.Tağızadə “CTK” informasiya agentliyinə və Çexiya radiosuna Azərbaycanın müstəqilliyini bərpasının 20-ci ildönümü və bu münasibətlə keçirilən “dəyirmi masa” barədə müsahibə verib.