Avropa

Ana səhifə

Avropa

CHP millət vəkili: “Hüseyn Aygünün dərhal sərbəst buraxılmasını tələb edirik”

13 avqust 2012 09:54 (UTC +04:00)

Bunu Tuncelidən APA-ya açıqlamasında Türkiyənin ana müxalifət partiyası olan Cümhuriyyət Xalq Partiyasının (CHP) Dənizli millət vəkili İlhan Cihanər deyib.

Hadisədən qısa müddət sonra Ankaradan Elazığa, oradan da Tunceliyə gəldiklərini qeyd edən İlhan Cihanər bunun qəbul edilməyəcək hadisə olduğunu bildirib: “Türkiyənin daha çox sülhə, qardaşlıq atmosferinə, birlik və bərabərliyə ehtiyacı olduğu bir vaxtda baş vermiş bu hadisə ölkəmizi Orta Şərq bataqlığına sürükləmək, Türkiyədə xaos yaradaraq bundan öz məqsədləri üçün istifadə etmək istəyənlərin çörəyinə yağ sürtür. Ona görə də millət vəkilimizin bir an əvvəl sərbəst buraxılması və bu cür hadisələrin təkrarlanmaması lazımdır”.

“Terror təşkilatı tərəfindən qaçırılan CHP Tunceli millət vəkilinin azad edilməsi ilə bağlı görülən işlərdə son durum nədir” sualına İ. Cihanər belə cavab verib: “Tunceli camaatı ayağa qalxıb, hadisəyə reaksiyalar həm burda, həm Türkiyədə, həm də dünyada hər an böyüyür. Millət vəkilimizin bir an əvvəl sərbəst buraxılmasını və PKK-nın bu tip əməllərə son qoymasını tələb edirik”.

Qeyd edək ki, CHP-dən olan millət vəkili Hüseyn Aygün avqustun 12-də axşam saatlarında PKK terrorçuları tərəfindən qaçırılıb. H. Aygünün Tuncelinin Ovacık rayonundan çıxdığı zaman terrorçular tərəfindən qaçırıldığı bildirilir.

Onunla birlikdə köməkçisi və “Axşam” qəzetinin müxbiri də olub. Lakin millət vəkilini girov götürən terrorçular köməkçisini və müxbiri sərbəst buraxıblar.

H. Aygün Tuncelidən millət vəkili seçilib.

CHP