Avstriya, Polşa və Çexiya qeyri-qanuni miqrasiyanın qarşısını almaq üçün Slovakiya ilə sərhəddə nəzarət tətbiq etmək qərarına gəlib.
APA-nın TASS-a istinadən verdiyi məlumata görə, tədbir yerli vaxtla gecə yarısı (Bakı vaxtı ilə 02:00) qüvvəyə minib.
Polşanın daxili işlər naziri Mariuş Kaminski bildirib ki, ölkə hakimiyyəti Slovakiya ilə sərhəddə müvəqqəti nəzarəti bərpa etmək qərarına gəlib. O vurğulayıb ki, mövcud prosedurlara əsasən, tədbir ilkin olaraq 10 gün müddətinə tətbiq edilir, lakin onun uzadılması ehtimalı yüksəkdir. Nazir bu qərarı Balkan istiqamətində qeyri-qanuni miqrantların axını ilə əsaslandırıb.